Danişîna doza endama Lijneya Rêveberiya Navendî (MYK) ya Komeleya Mafên Mirovan (ÎHD) û rêvebera Şaxa ÎHD’a Îzmîrê Vetha Aydin Yuksel ku bi îdiaya “Endamtiya rêxistinê” tê darizandin dê sibe bê lidarxistin. Raportora Taybet a Parastina Mafên Mirovan a Neteweyên Yekbûyî (NY) Mary Lawlor têkildarî danişîna Aydin li ser hesabê xwe yê Twîtterê peyamek parve kir.
Di parvekirina xwe de Lawlor wiha got: “Parastvana mafên mirovan Vetha Aydin dê sibe li Tirkiyeyê bi tawanbariya terorê bê darizandin û ez ê ji nêz ve dozê bişopînim. Heke were girtin, dê bi cezayê hebsê yê 15 salan re rû bi rû bimîne.”
Di heman demê de Lawlor nameya hevpar a di gulana 2021’an de tevî 7 raporên din ên NY’yê ji bo Tirkiyeyê şandine jî parve kir. Di nameyê de fikarên têkildarî girtinên demdirêj ên parastvanên mafan hatibûn vegotin û navên 22 parastvanên mafên mirovan hatibûn rêzkirin. Di nava kesên behsa xeberê de Vetha Aydin Yuksel jî hebû.
