Zerîfa hilmê Resûlî peyê xo de, porê xo de hîs kerdêne. Na reya yewine nêbî ke hilmê mêrdeyê xo porê xo de, vîyeyê xo de hîs kena. La no hilmêko winayên nêbî, qet weşê aye nêşîyêne

Zerîfa bi fikar û tersî vernîya Resûlî de rayîr ra şîyêne la ferq kerd ke gamê Resûlî nêzdîyê aye bîyî. Zerîfa nêewtanayêne ke peyê xo ra biewnîya. Eya Resûlî heta ewro reyêk zî nêdaybî aye ro la a ey ra hertim tersayêne çunke hem mîzacê Resûlî wina tal û tirş bî hem zî a zanayêne ke a seba ke mabênê dewan de şer nêvejîyo, ameybî dayene. A fikîrîyaybî ke a zî bilez şêra yan zî agêra peyê xo û biewnîya ke Resûl ha se keno. Nêeşkîya çîyêk zî bikera tena vernîya mêrdeyê xo de rayîr ra şîyêne. Gamê Resûlî hende bîybî nêzdî ke êdî vengê hilmê ey zî ameyêne goşanê aye. Seke yewî awa serde ganê aye ro kerdbî, wina cemed bestbî ganê aye. Eke biwaştêne qisey bikera bawer nêkerdêne ke ziwanê aye bigêrîyo. Mêrdeyê aye yê 16 serran peyê aye de bî la a tersayêne hem zî zaf tersayêne, lingê aye êdî sist bîbîy û peynîya peyêne de vindetî.

Sey Zerîfa Resûl zî hem tersayêne hem zî recifîyayêne. Cinîya ey, maya gedeyanê ey, ey ra ver şîyêne, o zî sey cinîya xo tersayêne. Beno ke ê her di zî a game eynî çîyan fikirîyayêne; gedeyanê xo. Resûlî yew bi yew gedeyê xo ardî vîrê xo. Zelala ey a rind û jêhate. Eynî sey maya xo çimkesk û bejnbarî bî. Ey do na rewşe senî aye rê îzeh bikerdêne? Xelîl û Huseynê ey. Lajê ey, gama ke pîl bîbê do nêvajê gelo to se kerd maya ma?  Nê persî mezgê Resûlî de her ke şîyêne bîyêne zêde tewr peynî zî cinîya xo arde vîrê xo. Şewa verêne ke ê zewicîyaybî… A şewe Resûlî hende Zerîfa ra hes kerdbî ke zereyê xo de vatbî, baş bî ke nê çîyî qewmîyayî û ez na cinî reyde zewicîyaya. La nika destê ey de kerrayêke, peyê cinîya xo de vindeto eke cesaret biko û do piro do.

Zerîfa hilmê Resûlî peyê xo de, porê xo de hîs kerdêne. Na reya yewine nêbî ke hilmê mêrdeyê xo porê xo de, vîyeyê xo de hîs kena. La no hilmêko winayên nêbî, qet weşê aye nêşîyêne. Aye cehd kerd ke peyê xo ra biewnîyo, la firsend nêdîybî. Resûlî a kerraya girde daybî sereyê aye ro. Zerîfa mîyanê çend sanîyeyan de ginaybî erd ro û gonîya sereyê aye, çîta aye ya sipîye kerdbî sûr û dima rişaybî herra ziwaye ser o. Resûl zaf tersaybî û çend deqayî zî bermaybî la qet poşman nêbîybî ke wina kerdo. A game gedeyê înan ameyî vîrê ey wina gamêk fikirîya, vindet û dima va ganî ez nê meyîtî ra pak biba. Waşt ke herre bikeno la payîz bî, herre bîybî sey kerra, huşk bîybî. Ameybî aqilê ey ke ê kerrayê ke ameybî arêdayîş, o do cinîya xo, maya gedeyanê xo dekero binê quça kerrayan. Xora kerrayî zaf gird nêbî. Hema bi çend deqayan tayê kerrayê hewa naybî û cinîya xo dekerdbî bin. Ê kerrayê ke vetbî û sewbîna xilikê hêgayî ke pêser kerdbî, tay velg zî daran ra çînaybî û eştbî Zerîfa ser û serê aye girewtbî.

Zerîfaya belengaze bi emrê xo yê 13 serreyî de seba aştîya dewan ameybî qurbankerdiş û nika binê quçe de ya. Resûl ageyraybî keye. Gedeyê ey ey ra persaybî: “Bawo ka maya ma?” Resûl tena eşkîyaybî vajo ke, “Keyeyê bawkalê şima de ya.” La wina nêbî.  Zerîfa ha binê quçe de hema ganî bî. Resûlî texmîn kerdbî ke merda la wina nêbî. Aye ra zaf gonî şîybî, darbêka zaf pêt ginaybî sereyê aye ro la Homayî temam nêkerdbî. Zerîfa seba gamêk çimê xo biney akerdî. Tarî bî her ca, tena roşnîyêk asayêne, mîyanê kerrayan ro tîrêjêka tîje dayêne çimanê aye ro. Verê, aye va qey a merda la dima vengê kutikan ke ame goşê aye, aye zana ke hema ciwiyena la zaf nêvîyart ke reyna çimê xo padayî. Kutikî derûdorê quçe de ameybî pêser. Ameybî boya gonî. Kutikî hende lawaybî ke bala şiwaneyî zî antbî xo ser. Şiwane ame quçe ser û dî ke tayê kerrayan ra gonî est a, verê o zî tersa la dima dest pêkerd ke kerrayan yew bi yew hewa no. Şiwaneyî Zerîfa herî wenaybî û berdbî bîran ser. Fatmaya cîrana Zerîfa zî bîrî ser o bî ke awe bera keye. Aye a şinasnaybî û fehm kerdbî ke se kerdo. Sereyê herî tepîşt a û şiwaneyî, bi bermayîş heta keyeyê pîyê Zerîfa a berdbî.

Ne Zerîfa zanayêne ke çira sey meyîtî herî ser o ya ne zî şiwane fehm kerdbî ke a kam a û se bîyo. La mîyanê înan ra yewî zanayêne û heme çîyî fehm kerdbî, zaf zî poşman bîybî. Xo bi xo vatbî werrekna mi wina nêkerdene, werrekna mi Zerîfa ra bivatêne o kam bî? Eke Zerîfa bizanayêne ke çîyêko winasî est o, yan zî Resûl biameyêne bivatêne; Zerîfa, şar wina vano o kam bî ameybî keyeyê ma? Aye do bivatêne birayê mi bî. Tîya ro vîyart ame ma dî û şî karê ey lezgîn bî nêvindet to rê zî selamî kerdbî la mi xo vîrî kerdbî ke to ra vaja…

Zerîfa bi çend serran keyeyê pîyê xo de mendbî, birayanê aye waştbî ke Resûlî bikişê la pîyê înan destûr nêdaybî û peynîya peyêne de pîyê aye reyna a daybî kiştoxê aye yê sernêkewteyî…