Zerîfa zî seba ke maya aye a banderê deştene kerdbî, wexto ke ameybî na dewe çend aşman ra pey Resûlî ra waştbî ke aye rê makînayêke bigîro. Mêrdeyê aye bê ke taket-naket bikero şî aye rê makînayêke girewte
A şewe rayîranê dewe ra bêvengî û tersî ra vêşêr çîyêk çin bî, tîje hema peyê koyan ra xo nênawnaybî ke Zerîfa û mêrdeyê xo Resûl pîya kewtbî rayîr ke şêrê dewa pîyê Zerîfa. Hem Resûlî hem zî Zerîfa zî zanayêne ke no şîyayîş yê xeyrî nîyo. Çunke nê nêmeyê şewe de Resûlî Zerîfa hewnî ra wirznaybî û bê ke çîyêk vajo kewtbî rayîr. Zerîfa û Resûl nê 16 serrî yo ke zewicîyaybî, Zerîfa dewêka bîne ra bîybî veyva na dewe û şarê na dewe zî aye ra hes kerdbî. Aye zî mêrde û dewa xo ya newîye ra hes kerdbî û xo wina dîyêne ke seke na dewe de bîya pîl. Xora wina zî bî. Zerîfa hema 13 serre bî ke pîyê aye a daybî, vera berdêlî Birayê Zerîfa merdimêka Resûlî remnaybî û seba ke mabênê dewan de şer nêvejîyo Zerîfa bîybî qurban. La reyna zî hem Zerîfa hem zî Resûlî nê çîyî xo vîr ra kerdbî û yewbînan ra hes kerdbî. Înan ra 3 gedeyî ameybî dinya: Zelale, Xelîl û birayê înan o şenik Huseyn. Huseyn çend şenik bo zî êdî şit ra biryaybî û heme berpirsîyarîya Huseynî vîyeyê Zelale de bî. Coka Zelale û birayê xo hema hewn de bî ke pîyê înan maya înan girewtbî berdbî.
Keyeyê înan, Resûlî zewacî ra dima daybî viraştene. Teberê dewe ra rayîrî ser o bî, sey xeleta veyveyî pîyê Resûlî o hêga daybî înan û Resûlî zewacî ra serrêk dima ê hêgayê xo mîyan de keyeyêk daybî viraştene. Keyeyê înan bi 2 oda û salonêk bî. Resûl û Zerîfa odayêke de bîyî, odaya bîne de zî gedeyê înan rakewtêne la eke mêmanêk est bîyêne gedeyê înan zî ameyêne hetê înan, a odaya bîne zî dayêne mêmanan. Xora zaf mêmanî zî nêameyêne. Êyê ke ameyêne zî keyeyê înan de nêmendêne. Ge-ge maya Zerîfa yan way û birayê aye eke biameyêne bi çend rojan keyeyê înan de mendêne. Zerîfa sey maya xo rind û bejnbarî bî, çimê aye zî sey yê pîyê xo kesk bîy. Resûl zî qet sey birayanê xo nêbî. Seke yeno vatene o mendêne kalikê xo. Kalikê ey zî sey ey wina biqewet û qamderg bî. Eke dûrî ra kesêkî Resûl û Zerîfa bidîyêne, vatêne qey merdimêk û gedayêke ha yenê. Qaso ke Zerîfa bejnbarî û şenik bî Resûl zî mirdîya xo xurt û biney zî rîtirş bî. Ge-ge hende bêtehm bîyêne ke kes nêewtanayêne ke seya ey ra biewnîyo.
Dewa înan zî vera koyêkî de bî. Serê koyî heta peynîya wisarî zî sipî asaneyêne, binê dewe ra zî royêk vîyartêne. Zimistanî çend çetin bibo zî hamnanî şarê na dewe keyf kerdêne. Bi tîja serê sibayî roşn û germ bîyêne û seya hela şanî de hende honik bîyêne ke dewijan bi saetan sohbet kerdêne heta ke bibo şan. Derdorê na dewe ra çend dewê bînî zî est bî la dewa tewr girde na bîye. Sey her roja na dewe a roje zî, dîkî bi azanê serê sibayî veng daybî û dewijî hêdî-hêdî hewnî ra wirzîyaybî. Êyê ke karê înan est bî, hemîne dest bi karê xo kerdbî û tîje zî êdî peyê koyan ra vejîyaybî vera-vera germîya tîje zî resayêne dewijan. Kesî nêzanayêne ke şewe se bîyo û xora kesî zî texmîn nêkerdêne. Zelale zî şefeqî ra wirzîyaybî û seba bira û may û pîyê xo arayî hazir kerdêne. Xora karê aye bî no. Arayî, werd, şamî taştî û heme karê bînî ke mîyanê keyeyî de yenê kerdene, pêro karê aye bî. Birayê aye Xelîl zî şîyêne bizan ver pîyê înan zî eke cite yan zî palîyêk bibo, kerdêne nêke dewe mîyan de bî. Şîyêne mêmanî, şar ameyêne hewşê înan de binê tûyêre de roniştêne. Şarî tira hes kerdêne, terraqa ey weş bî, merdim ey ra aciz nêbîyêne.
Zerîfa zî seba ke maya aye a banderê deştene kerdbî, wexto ke ameybî na dewe çend aşman ra pey Resûlî ra waştbî ke aye rê makînayêke bigîro. Mêrdeyê aye bê ke taket-naket bikero şî aye rê makînayêke girewte. Zerîfa hem xo û gedeyanê xo rê hem zî seba tayê dewijan cil û fîstanî deştêne. Fîstanê xo yo peyên, yê cîrana aye Fatma bî. Fatma cîranê aye bî çunke keyeyo tewr nêzdî yê Fatma bî. Fatma çend hewteyan ra ver ameybî keyeyê înan û aye waştbî ke seba veyveyê lajê xo aye rê fîstanêk biderzo. Fîstano ke Zerîfa deştbî fîstanêko rengin û çîçegin bî. Hem Zerîfa tam goreyê zerrîya xo deştbî hem zî Fatma zaf tira hes kerdbî. Fatma rojêk seba ke fîstanê xo biceribno ameybî keyeyê Zerîfa. Aye çîyêk dîybî û herinda ke Zerîfa ra bipersa, şîybî dewe mîyan ra vila kerdbî. Beno ke nîyetê aye hende xirab zî nêbî la aye nêzanayêne çi ardo sereyê Zerîfa ser. Zerîfa rojanê peyênan de fehm kerdbî ke tayê çîyî qewmîyenê la yew mana nêdaybî û zaf bala xo zî nêdaybî ser. Eke aye bizanayêne a do a roje bişîyêne hetê Resûlî û a do ey rê îzah bikerdêne. La bêmana bî êdî, erey bî. Resûl bîybî pirr û pîya şewêka tarî de ver bi dewa Zerîfa şiyênê.
Mabênê dewa Zerîfa û Resûlî nêzdîyê 6-7 km bî û mabênê dewan de zaf hêgayî çin bî, pêro qot û zinarî bî. Çend hebî hêgayî est bî, ê zî seba ke zaf kerra û kuçin bî, hêgayî hende kerrayan ra ameybî weçînayîş ke mîyanê hêgayan de quçê kerrayan virazîyaybî. Dûrî ra merdimî vatêne qey keyeyêk o, wina berz û hîra bî. A game ê hêgayan ra yewî ro vîyartêne. Zerîfa vernî de, Resûl zî aye dima. Zerîfa zanayêne, eke çîyêk nêbîyêne Resûl tim vernîya aye de şîyêne la ewro ê rojan ra yew nêbî. Zerîfa hem tersayêne hem zî fikirîyayêne gelo aye se kerdo?
Gelo a merdima Resûlî ke birayê aye remnaybî, çîyêk ameybî aye ser, yan zî aye bi xo çîyêk kerdo? Zerîfa mabênê nê her di îhtîmalan de şîyêne û ameyêne. Dima qerar daybî ke teqez çîyêk bîyo a cinîke. Birayê aye çîyêk bi aye kerdo û Resûl zî aye beno pîyê aye rê. Gelo Resûl do mi ca verdo? A game gedeyê aye ameyî vîrê aye, Zelale, Xelîl û Huseyn. Gelo ê se kenê? Hewn ra wirzîyayî gelo, Huseyn bermayo qet? Nê persî mezgê aye ra gêrayêne. Gedeyê aye hewn ra wirzîyaybî û Huseyn zî demêk bermaybî la Zelale o aşt kerdbî. Vatbî, dayê şîya palî yena.
Hewtêyêk ra ver dewe mîyan ra vatişêk vila bîybî. Vajîyayêne ke lajekêk şîyo keyeyê Resûlî, wexto ke Resûl keye de nêbîyo. Naye ra vêşêr kesî ne çîyêk dîyo ne zî eşnawito la na qale dewe mîyan ra vila bîybî û peynîya peyên de zî ameybî resaybî goşê Resûlî. Resûl çend cinîya xo ra hes bikero zî a game ra pey Zerîfa çimê Resûlî de bêqîymet bîybî. Bi rojan fikirîya gelo se bikero? Yan şêro cinîya xo reyde qisey bikero yan zî sey edetê dewijanê xo xo aye ra pak bikero? Bi rojan Resûl wina fikirîyaybî ge gedeyê înan ameyêne vîrê ey ge zî çimê cinîya ey ê keskî, bejna aye ya barî ke tira zaf hes kerdêne… Resûlî şewêke hewl daybî ke Zerîfa reyde qisey bikero la nêeşkîyaybî çîyêk zî vajo sereyê xo balişna ser ronaybî û rakewtbî. La sey her çîyî peynîya fikirîyayîşî zî ameybî û Resûlî qerar daybî ke o do namûsê xo pak bikero(!)
Nuşte do dewam bikero…
