Platformê 12ê Adare yê Stenbolî Qirkerdişê Sêwasî yad kerd û vat: “MÎTî verê destpêkerdişê şayîyanê Pîr Sultanî amadekarîya xo ya qirkerdişî kerdbî. Naye hinda her kes eşkera zano.”

Platformê 12ê Adare yê Stenbolî semedê roşnvîranê ke Qirkerdişê Sêwasî de dinyaya xo bedilnaye verê Cemxaneyê Gazîyî de aktîvîteya yadkerdişî organîze kerde. Xeylêk partîyê sîyasîyî û temsîlkarê rêxistinanê komelê demokratîkî tewrê aktîvîte bîyî.

Aktîvîteya ke bi rêzgirewtişî dest pêkerde de bi nameyê platformî Onur Narînî eşkerayîye wende. Narînî vist vîrî ke Qirkerdişê Sêwasî 29 serrî xo dima verdayî û vat: “Sêwasî ra heta Roboskî, Pirsûs, Garê Anqara adirê qirkerdişî dewam keno. Îqtîdarî sey vizêrî ewro zî fikrê azad, bawerîya cîya û wayûbiratîya şaran ra tersenê.”

Narînî vat: “2ê temmuza 1993î de otêla Madimakî de roşnvîrê elewîyî ameyî vêşnayene ke mîyanê înan de roşnvîr, şaîr û nuştoxê sey  Asim Bezîrcî, Metîn Altiok, Hasret Gultekîn, Muhlîs Akarsu, Nesîmî Çîmen bîbî. MÎTî verê destpêkerdişê şayîyanê Pîr Sultanî amadekarîya xo ya qirkerdişî kerdbî. Naye hinda her kes eşkera zano. A roje 33 roşnvîran û 2 xebatkaranê otêle pê vêşayîşî ya zî duyî ra dinyaya xo bedilnaye. Pîya bi gananê ma ame waştene ke merdimîye bêro vêşnayene la roşnvîr û şarê ma pê têkoşînê xo keyfê dîktarorîya faşîste qirrika ci de verda.”

Narînî vist vîrî ke kiştoxê qirkerdişî nêameyî cezakerdene û înan ra tayê sey xelatkerdişî mewkîyanê berzan ê dewlete de ameyî wezîfekerdene û vat: “Ewro îqtîdarê faşîstî yê AKP-MHPyî kesê ke sey înan nêfikrîyenê sey dişmenî vîneno û wazeno şaran biverdo pê. Heme heqê demokratîkî yê ke pê gan û gonî ameyî destfînayene, wazenê çîn bikerê. Xora bêkarîye û vêşanîye, şîdetê vera cinîyan zêdîyenê. Wextê ci yo ke ma vajê vinde. Vera îqtîdarê faşîstî serewedaritiş meşrû yo. Înanê ke ganê ma vêşnayî û dayî vêşnayene ma do înan xo vîr a mekerê.”