Qirkerdişê Dîgorî ra tepîya 30 serrî derbas bîyî. Dewleta tirke hema bi nê qirkerdişî nêameye têrî. Şarê Dîgorî muhakemekerdiş û edalet paweno.
14ê tebaxa 1993yî de bi hezaran dewijî vera ferzkerdişê cerdevanîye, sereştiş û polîtîkayanê îşkenceyî yê dewleta tirke dewa Nexşanî de kom bîbî. Girseyî dest pê rayraşîyayîşî kerd la 2 kîlometreyê dûrê Dîgorî de verê înan ame girewtene. Tîya de hêzanê dewlete girse da guleyan ver, 5ê ci domanî 17 kurdî qetil kerdî û 200 kesî zî dirbetin kerdî.
Gulcan Çagdavule (8 ), Selvî Çagdavule (14), Yeter Kerencilere (13), Necla Geçenere (14), Zarife Boylu (15), Erdal Bugan (17), Zeynep Çagdavule (19), Hacer Hacioglu (20), Suna Çîdemale (21), Fatma Parlake (22), Faruk Aydin (27), Cemil Ozvariş (39), Giyasettîn Çalişci (41), Hasan Çagdavul (43), Suleyman Taş (47), Nurettîn Orun (80) û Tutîye Talane (66) cayê serebûtî de ameyî qetilkerdene. Mesuldarê serebûtî hema zî nêameyî mehkumkerdene.
Qirkerdişî ra dima rêçê çekanê tîmanê taybetan ra ber, rêçê çeka roketeştoxî ameyî dîyene.
Muhakemekerdişê mesuldaranê qirkerdişî 11 serrî yo dewam keno la tede birêke nêdîyaye. Avûkatê dewa Tahîr Elçîyî 2004 de seba ke ‘muhamekerdiş derg bîyo, tehqîqatêko hîra nêameyo kerdene’ û ‘heqê ciwîyayîşî ameyo binpaykerdene’ dewa berde Mehkemeya Heqanê Merdiman a Ewropa (MHME).
Dima ke MHME dewa qebul kerde, mehkemeya dewleta tirke 2006 de îdîa kerd ke ‘polîsan xo pawito’ û polîsî vera dayî. Polîsan zî pawitişanê xo de îdîa kerd ke mîyanê şarî ra bi roketan ‘ê dîyayê bombayan ver.’
Dima ke Tirkîya bira veradayîşî daye MHME bira xo eşkera kerde û Tirkîya mehkuma tazmînatê madî û manewîyî kerde.
Ê rayraşîyayîşê dewijan de domanan kincê bi rengê kesk, sûr û zerdî xo rê daybî, flamayê bi nê rengan berz kerdbî. Leşkeranê artêşa tirke verê şarî girewt, pêser hêrişê cinî û ciwanan kerdbî. Qirkerdiş de bi giranî doman û cinîyî ameybî qirkerdene.
Qirkerdişî ra dima zî cenazayê tay dewijan peyê panzeran ra ameybî girêdayene û heta merkezê qeza ameybî kaşkerdene.
Şarê Dîgorî qirkerdişî ra dima, rixmê teda, îşkence û tepiştişî zî dewa xo nêteriknaye.
