Amed de qezaya Rezan de Şarederîya Rezan newera Merkezê Karê Weşîye ame akerdiş. Seba ke şarî rê xizmeta karê weşîye bê pere amêne kerdêne aye ra qeyûmî kar da vindarnayene.
10ê nîsane de Şaredarîya Rezan cayê merkezê karê weşîye newera ame akerdene. Akerdişê cayê karê weşîye de Hemşaredaranê Peyasî, Yenîsehîrî, Sûrî û zaf kesê partîyîjî û komelê rêxistinanê sîvîlî beşdar bîyî. Akerdişê cayê weşîye ra dime, yew sinevîzyon da nawnayîş û badî zî, Koma Helweste bi deyranê kirmanckî bi coş û kelecanî ra şarî reyde deyrê xo pare kerd.
Derheqê akerdişê cayê weşîye ser, mudurê karê weşîye Evîn Serîn Karabîber û doktorê weşîye Firat Akenginî rojnameyê marê qalî kerd.
Ma zafêrî cînîyan û gedeyan rê xizmete danê
Evîn Serîn Karabîbere seba nê cayê xizmeta Karê Weşîya di qate wina vat: “Seba ke hetê qeyûmî ra nê cayê Karê Weşîye amebî windertiş, ma zî ewro nê cayê karê weşîye newera kenê xizmeta şarî.”
Evîn Serîn Karabîbere wina dewam kerd: “Bi zafêrî ma cinîyan û gedeyan rê xizmete danê. Cayê weşîya enjeksîyonî, Polîqilînîkî, Cayê Pansumanî, Şîvermendîya Lavnayîşî, Odeya Dîyetîsenî, Odeya Teknîkerê Rontgenî, Plansazîya Keyeyê labartuvarî û demê averîyî de zî, Polîqilînîkê didana de zî xizmete danê.”
Ziwanê dayike de perwerdeyîya weşîye
Evîn Serîn Karabîbere armancê cayê karê weşîye ser vatena xo wina qedênê: “Ma heme karê xizmetê weşîye bi ziwanê dayikera danê. La çiheyfo ke, êyêke SSK’ya înan çinîya zafê û ayera re re pisgêrêkî vejîyenê. Ancî zî êyê ke nêeşkenê derman bigîrê, ma înan rê bêpere derman û derzînan peyda kenê. Ma taybetî perwerdeyê weşîye danê û ardimê weşîya verêne senî beno aye ser perwerde danê. Ma dewan de pêroyî weşîye ser xebat cigêrayîşî kenê. Gedeyan rê firçeyê û macûnê didanan vila kenê. Ancî zî xêzefilmanê gedeyan seba perwerdeyî weşîye ra danê nawnayîş.”
Bi taybetî ma seba weşîya şarî dewe bi dewe gêrenê
Doktorê merkezê Karê Weşîye Firat Akengînî zî mexsedê nê cayê karê weşîye ma rê da zanitene û wina vat: “Akerdişê cayê karê weşîye de, ma heme hetîra bi ziwanê dayike de û bê pere xizmete danê şarê xo. Êyê ke, debara înan çinîya û ewtade dermanxaneyê eczaneye ma esto û êyêkê reçeteyê înan çinîyo ma heme tewr bêpereyan ra derman danê ci. Ewta de ma nêzdîye 60î kesan rê ardim kenê. Zafêrîyê nînan cinîyê û gedeyê. Bi taybetî ma dewe dewe gêrenê weşîya şarî ra alqeder benê. Seba dayîşê dermanî ra tikê proplemî vejîyenê la ancî zî şaredarîya ma heme çî tedarik kenê.”
Demê avêreyî de ma zaf çîyan bikerê
Doktor Firat Akengînî vatena xo wîna qêdênê: “Ma nê gêrayîşê dewan de qontrolê cînîyanê diganan zî kenê. La ma wezenêke şarê xora hîna zaf xizmete bikerê. La enka zaf îmkanê ma çinîyê. Demê avêreyî de beno ke ma, seba weşîya şarî ra zaf çîyan bikerê. Seba weşîya şarî çi milê ma ser bikero ma do heme çî bikerê. No warî de şar zî paştî bido ma û semînerê weşîyan ra zî beşdar bibê.”
