Sûrîye de 27ê teşrîna peyêna 2024î de şerî dest bi kerd. Heyet Tahrîr eş-Şam, Artêşa Neteweyî ya Sûrîye û mutefîqanê înan verî Heleb, dima Hama û Hûmûs yew demo kilm de girewtê binê destê xo. Dima zî 8 kanûna 2024î de Şam girewt binê kontrolê xo. Dewleta Tirkîya û Artêşa Neteweyî ya Sûrîye epey wexto ke semedo ke bikewê Rojava, amadekarîya xo kerdêne. Wexto ke Heyet Tahrîr eş-Şamî Heleb girewt. Bi destekê Tirkîya, Artêşa Neteweyî ya Sûrîye semedo ke Tel Rifatî bigêro dest bi operasyonî kerd. Dewleta Tirkîya teyareyê şerî tede, heme teknîkê xo yê leşkerî, destek dano Artêşa Neteweyî ya Sûrîye. Verî dest na Til Rifatî ser û dima zî peynîya yê şerê xidarî dest na Minbîcî ser. Peynî de zî Heyet Tahrîr eş-Şamî Deyrozor girewto binê kontrolê xo. Aseno ke na ser o nêvindenê, wazenê ke heme Rojawanî îşgal bikerê. Nika zî vera xo tadaya Kobanê û wazenê Kobanê îşgal bikerê. Dewleta Tirkîya bi teyarayan Eynul Îsa de gedeyî tede 12 tenî qetil kerdî. Minbîc de nêweşxane de merdimê bîrîndarî qetil kerdê. YPGyijê ke ameyê tepiştiş, ganî ganî bi allahûekberan û bi selawatan yenê qetilkerdene. Bi seyan merdiman îşkence ra vernenê, merdiman remnenê û mûqabîlê înan de fidye wazenê. Tayê nîjadperestê Tirkîya vera nê kerdeyan adeta roşan kenê. No tam yew wahşet o.
Dewleta Tirkîya Artêşa Neteweyî ya Sûrîye rê perwerde dayo, çekî dayê ci û bi hawayêkê madî û manewî ardim dana ci. Nê rêxistinî dişmenê merdimanî yî. Zerreyê Tirkîya de aştî waştiş, teberê Tirkîya de şer de israr kerdiş yew nakokî ya. Wina hawa, mesela hina zaf girîft bena. Vanê ke kurdî birayê ma yê, la teberê Tirkîya de kurdan qetilkerdiş yew tezad o. Hemserekê DEM Partî vanê ke; “Seba aştî ma hedre yî, çi bekewo ma sîyar/ser, ma kenê. Fermandarê Hêzanê Sûrîyeya Demokratîke Mazlûm Kobanê zî vano ke, “Ma nêwazenê ke Tirkîya reyra şer bikerê, ma wazenê ke meselayanê xo bi dîyalog çareser bikerê.”
Nê rojanê verênan de Fermandarê CENTCOMî Kurîlla ame Rojava. Verî berpirsîyarê Hêzê Sûrîyeya Demokratîke zîyaret kerdî, dima zî wargehê leşkeranê Amerîka zîyaret kerdî. Na sira/mîyan de bi mîyançîya Amerîka, Hêzê Sûrîyeya Demokratîke, Dewleta Tirkîya û Artêşa Neteweyî ya Sûrîye reyra Minbîc de yew paymana adirbesî îlan bîye. Nê mîyanî de Wezîrê Karanê Teberî yê Amerîka Blinken zî ame Anqara. Aseno ke Amerîka wazena ke Hêzanê Sûrîyeya Demokratîke û Tirkîya de yew têhetameyîş bibo. Eke yew têhetameyîş bibo, ma zî wazenê bi mîyançîya Amerîka temamê Sûrîye de yew adirbes îlan bibo. Dima zî na mesela bi dîyalog kok ra çareser bibo. Xora ma zî vanê ke hem zerreyê Tirkîya de hem zî teberê Tirkîya de kurdan reyra bêrê têhet.
Destek medê Heyet Tahrîr eş-Şam û Artêşa Neteweyî ya Sûrîye. Nê rêxistinan zafê ey verê Talîbanî mîyan de, dima DAÎŞ û El-Nusra mîyan de ca girewto. Nê merdiman verî ganî-ganî merdimi veşnayî, sereyê merdiman derra kerde û heme tewir îşkenceyî kerdê. Cinî hêsêr girewtê û tecawuzê înan kerdo. Cinîyî sey yew mal bazaran de rotê. Nika zî Heyet Tahrîr eş-Şam û Artêşa Neteweyî ya Sûrîye leşkeran veşnenê, bi çekan cinîyan remnenê û tecawuz kenê; merdiman remnenê, mûqabîlê înan de fîdye wazenê. Hetta fîynenê nêweşxaneyan sîyar/ser û nêweşan qetil kenê. Leşker, buroqrat û hunermendanê rejîmî qetil kenê. Rap-raşte de bi tekbîran û çekanê otomatîkan sîvîlan qetil kenê. Hetta vîdeoyê înan ancenê û medya de par/bar kenê. Nê kerdeyî muyanê merdimi telî/teli kenê. Nê kerdeyan, qet yew wijdan qebul nêkeno.
Îsraîlî verî herêmê tamponî girewtî binê destê xo. Dima bi teyaranê cengî, goreyê na saete bi 500 rayan wargeh, meydanê teyaran, cepxane û heme cayê artêşe bombardiman kerdê. Îsraîlî ver bi Şamî yew operasyono bejayî kerd. Beyntarê (mîyanê) nê sîndorê Îsraîl û Şamî de vîst km mendo. Aseno ke ê do binê Sûrîye de yew herêma tamponî awan bikerê. Ewta de wazenê durzîyan rê yew erd bigêrê. Lazkîye bombardiman kenê. Îsraîl nê hêrişanê xo hima zî dewam keno.
Nê pancas serrî yo ke Tirkîya de şer dewam keno. Nê duyes serrî yo ke Sûrîye de şer dewam keno. Yew serre vêşêr o ke mîyanê Îsraîl û Hamasî de şer dewam keno. Verê cû zî heşt serrî şerê Îran û Iraqî ramit. Yew wext Şerê Kendawe de Seddamî bi des hezaran kurdî qetlîam ra vernayê. Des serrî ra ver DAÎŞî hem Iraq de hem zî Sûrîye de adeta şarî bi taybetî kurdî yew qetlîamo pîlî ra vernayê. Verî zî sewbîna şerî zî bîyê. Şaranê Rojhelatê Mîyanênî nê çenday serrî yo ke yew huzur nêdîyo. Na cografya hinê gonî ra mird bîya. Yewna het ra sîvîlî, gedeyî, cînî tede bi se hezaran qetil biyê. Bi mîlyonan merdiman koç kerdo. Nika ra pey zî rewşa Rojhelatê Mîyanênî rind nêasena. Vanê, şewa tarî şan ra bellî ya.
Şer yew qeder nîyo. No hewte, hewteyê heqanê merdiman o. Bi na wesîla ez wazena ke kurdî tede heme şarê Rojhelatê Mîyanênî û heme şarê dinya mîyanê aştî de û bi heqanê xo yê xozayê biciwîyê. Ez bi na hêvî Roja Heqanê Merdiman a wendoxan pîroz kena.
