22yê citmenge de Dewlet Bahçelî meclîs de şî destê wekîlanê DEM Partî tepişt û va, wa Ocalan bêro meclîs de qalî bikero, PKK xo tasîfîye bikero û Ocalan zî heqê hêvî ra feyde bivîno. Tabî nê vatişê Bahçelî ra her kes mat mend. Ecêb Bahçelî vano se, çîrê çi îcap kerd. Hîdê dimi ra zî heyet şî Girawa Îmrali Rayberê Şarê Kurdî reyde pêvînayîş kerd û heyetî yew name ard. 27ê sibate de yew deklarasyonî reyde vengdayîş da û vengdayîşê Rayberê Şarê Kurdî Abdullah Ocalanî Meydanê Şêx Seîdî de ame wendiş û heme hetan ra nê vengdayîşî gulbang da. Hînê badî zî 12yê gulane de PKK’yî xo fes kerd û 11ê temmûze de yew komêka gerîlayan çekê xo ronayî, veşnayî û eşkerayî daye. Seba nê prosesê newî DEM Partî heme bajar, qeza û taxan de şarî reyde kombîyayîşêkî viraştî û hema zî nê kombîyayîşî dewam kenê.
Polîtîkaya îmha
Seba nê prosesê newî hetê îqtîdarê AKP û MHP’yî ra ray- ray beyanetî yenê dayene û tewr peynî de zî birîyarê viraştişê yew komîsyonî ame girotiş. Gureyê nê komîsyonî çî yo, çi beno û hetê huqûqî ra rol û mîsyon çî yo. Hema zî dîyar nîyo. No ware de PKK heyana ewro bê şert û merc gamêkê tarîxî vistî. La hetê Îqtîdarî ra heyana ewro yew gama muhîme nêerzîyaye. Verade eştişê game hewayê her wextî operasyonê îmha û înkarî dewam kenê. Nê warî de şarê kurdî zî bawerîya AKP û MHP’yî nêkeno. Bi tena şarê kurdî bawerîya Rayberê xo keno û bawerîya xo keno. Seba Serokkomar Erdoganî zaf çîyî yenê vatiş. Çîyê ke yenê vatiş, Erdogan nêwazeno ke no proses bidomîyo û hetê bînî ra zî vatişo bîn zî AKP’yî mîyanî de yew klîk est o, nêwazeno aştî û pêameyîş bivirazîyo.
AKP û samîmîyet
La çîyo ke raşte de aseno, AKP mîyanî de yew samîmîyet çinî yo, eke samîmîyet bibîyêne, operasyonê leşkerî, îmha û înkarî nêbîyêne. PKK bê şert û merc adir birnayîş îlan kerd. La îqtîdar se keno, her roje operasyonan virazeno û vengdayîşê teslîm girotişî keno. Zîndanan de embazê ke 30 serran ra vêşêr rakewtî înan serbest veranêdano û embazan nêweşan zî veranêdano. La gelo no senî prosesê aştî û pêameyîşî yo. Her roje îqtîdar operasyonê şaredarîyanê CHP’yî keno, tepişeno û keno zerre. Bi hesaban ra CHP’yî teberê nê prosesi de tepişenê. CHP partîya dewlet a, labelê CHP senî nê prosesî dewam bikero.
Taktîkê xejilnayîşî
No hewa proses zaf giran şono û AKP taktîkê xejilnayîşî keno. La çî rê taktîkê xejilnayîşî keno û seba prosesî gamêke nêerzeno? Hema zî polîtîkaya xapênayîşî kenê û nêwazenê ke nê prosesê aştî de pêameyîş bivirazîyo. Bahaneya xejilnayîşî eşkera yo. AKP hema zî heme çî giraneyî ra dest pêkeno û wazeno ke polîtîkaya Rojawanî senî dîyar bibo? No sebeb ra heme çîyî rewşa girane û xapênayîşî ra şonê. Rojawan seba şarê kurdî yew xêza sûr a. AKP zî statûyê Rojawanî qebul nêkeno. Her wext cerganê Şara ra wayîr vejîyeno û veranêdano ke kurdî Rojawan de wayîrê yew statûyî bibê.
Kurdan rê yew weçînek
Bê AKP senî yew prosesê aştî û pêameyîşî bidomîyo. No proses bê MHP, CHP û DEM Partî dewam bikero. Eke AKP nê sîyasetê xo yê qilêrinî bidomno, weçînayîşê neweyî bikero dewre, bawerî est a ke ganî AKP na polîtîkaya xo ya qilêrine ra fek verado. Na zî sewbîna tewr zî do AKP peynîya xo bîyaro. Beno ke nê demê nizdî de Rojhelatê Mîyanênî de kerrayê sînoran ser newe ra bibedilîyê û nexşê neweyî bivirazîyê. No sebeb ra zî ganî AKP rewşa leze ra gamêke bierzo û rewşa xapênayîşî ra fek verado. Rojhelatê Mîyanênî de heme îbreyî hetê kurdan de tadîyenê. No ware de se beno wa bibo ancî zî kurdî serkewenê.
