Meclîsê Tirkîye ra yew Komîsyonê Aştî û Demokrasî awan bîyo. No Komîsyon 51 endaman ra yeno meydan. Komîsyonî heta eyro epey şexsan û temsîlkaranê sazîyan û dezgeyan reyra dîdarî kerdê. Hewayo ke aseno, ko nê dîdaranê xo heta 15ê êlule dewam bikero. Terafê kurdan wazeno ke Komîsyon, serbido Rayber Ocalanî ro zî. Eke Komîsyon Rayber Ocalanî reyde qalî/qisey bikero û pêşnîyazanê ey bigêro, ko vernîya Komîsyonî abibo. Hûnkifê/mûxatabê na mesela Ocalan o. Eke no Komîsyon nê dîdarîyan nêkero, giranîya ey zaf nêmanena. Aseno ke Komîsyon hem hêdî û hem zî bi sîndor xebitîno. Yewna het ra komîsyon, derheqê xebatanê xo de malumat nêdano rayapêroyî.
Yew het ra goya Prosesê Aştî û Demokrasî dewam keno, yewna het ra vera partîya CHP û HDK/KDŞ’yî operasyonî dewam kenê. Yewna het ra, Serekkomar Erdogan vera Rojawanî gefan veno, bahsê kalmî/şimşîrî keno. Serekkomar vano ke “Kalme qewlixê/qilifê xo ra vejîyo, tepa/tepîya nêdebeno zerre.” No ziwan ziwanê aştî nîyo, ziwanê şerî yo. No ziwan hêvî nêdano ma. Yanî ewta de kurdanê Sûrîye tehdît keno. Ma no tewir yew ziwanî ra nerehet benê. Ma raşta raşt vanê ke, ma hinê nêwazenê ke Dewleta Tirkîya hêrişê/gala kurdanê Sûrîye bikero. Mesela tewr peynî de Sûrîye de çeteyê ke girêdayeyê Tirkîya yî, Kobanê de yew depoyê awe bimbardiman kerdo. Yewna het ra Dewleta Tirkîya eşîrî ke binê hukmê înan de yî (eşîrî ke binê banê eşîra Buşebanî de yî), wazena ke nê eşîran vîyar Rojawanî bido, Rojawan de qaos vejo. Yewna het ra Devlet Bahçelî zî gefanê Rojawanî veno. Dewlet Bahçelî verî vat ke ”Wa ocalan bêro Meclîs de Kombîyayîşê DEM’î de qalî bikero.” Nika zî kurdanê Sûrîye tehdît keno û vano ke “Anqara û Şam ko vera Rojawanî pîya operasyon bikerê.” Kurdanê Rojawanî reyra pêrodayîş, kurdanê Vakûrî reyra pêameyîş nêbeno. Eke şima samîmî yî, heme kurdan reyra pêbêrê.
Tirkîya û HTŞ
Sûrîye de heme çîyî goreyê waştişê Tirkîya nêşonê. Tirkîya wazena ke HTŞ reyra tifaqe verazo, hetta pey perdî de wazena Sûrîye îdare bikero. Heme dinya zana ke, HTŞ û lîderê ey terorîst o. Yewna het ra Yewîya Amerîka, Rojawan sey yew hevalbendê xo qebul kerdo. Dewleta Tirkîya ver de di rayîrî est ê; ya kurdanê Sûrîye qebul kena. Xora kurdî Sûrîye wazenê ke Tirkîya reyra pêbêrê. Ma zî wazenê ke dewleta Tirkîya HTŞ reyra nê, Rojawanî reyra hereket bikero. Xora zereyê Tirkîya de, yew Prosesê Aştî û Demokrasî dewam keno, eke dewleta Tirkîya kurdanê Rojawanî reyra hereket bikero, ko no proses zî serê xo bigêro. Ay wext vernîya Tirkîya zî abena û berê hûzûrî zî abeno. Eke HTŞ reyra hereket bikero û hêrişê kurdanê Rojawanî bikero, no Prosesê Aştî zî ko birêjîyo.
Şewa tarî, şan ra bellî ya
Sûrîye de hima zî germanîye dewam kena. Dûrzîyan xoserîya xo îlan kerda. HTŞ binê destî ra destek dano tayê eşîran, vîyarê Rojawanî dano. Yewna het ra HTŞ’yî durzî û elewîyî qebul nêkerdê. Vera înan zî nê çeteyanê eşîran organîze kena û vîyarê înan dano. Ewta de hukmatê Colanî tam yew dirîyîye keno. Yew vateyê verînanê ma est o, vanê “Şewa tarî, şan ra bellî ya.” Eke Colanî û hukmatê ey; heme şaran, mezheban, dînan, bîr û bawerîyan qebul nêkero û nê zîhnîyetê faşîzan de israr bikero, emre ey zî zaf dewam nêkeno.
Wa biciwîyo aştî!
No cografya hinê rijnayîşê gonî ra mird bîya. Ma hinê nêwazenê ne Tirkîya de ne zî Rojawan de şer bibo. Wa hinê hem Tirkîya de hem zî Rojawan de aştî awan bibo. Ez bi nê hîsîyatî, hêvî kena ke Roja Aştî bibo wesîleya demokrasî û seyyewbînanîye. Ez zerrîya safî ra Roja Aştî pîroz/bimbarek kena. Wa biciwîyo aştî!
