Rêxistinanê HDPyî yê Erxenî û Farqînî sergêra tayînkerdişê qeyûman de polîtîkaya hukmatî protesto kerde.

Şaredarîyanê Erxenî, Licê û Farqînî de 3 serrî ra ver bi destê hukmatê Erdoganî qeyûmî ameyî tayînkerdene. Derheqê na babete de Hemserekê HDPyî yê Amedî Gulîstan Atasoye û Zeyyad Ceylanî, tayê îdarekar û endamanê HDPyî eşkerayîyêke kerde. Hemserekê HDPyî Ceylanî wina qisey kerd: “HDP û sîyasetê demokratîkî xeylêk cayan de bi ferqê girdî şaredarîyî girewtî. HDP polîtîkaya ke şarê herêmî û xebata kolektîfe esas gêna reyra bena. Ma heq, huqûq û edalet esas girewt û kewtî sîyaset. Şar wayîrê ma vejîya. Ma her tim vanê ke qeyûm dişmenê îradeyê şarî yo. Qeyûm seba şarî xizmetêk nêkeno. Cayo ke tede qeyûm esto de talan û dizdîye esta. Şarê ma naye zaf baş zano û ma do pîya înan ra hesab bipersê. Armancê înan şikitişê îradeyê şarî yo. Labelê înan îradeyê nê şarî bincaran nêşikit û ê do naye sernêbikewê.”