Polîsê tirkî îdarekaranê Rêxistina HDPyî ya Esenyurtî Hîcran Yildize û Muhammed Baranî rê ajanîye ferz kerde.
Muhammed Baranî ard ziwan ke verî polîsan pê telefonî venga ci da ke şoro qereqolî û dima polîsan reyna ci rê telefon kerd, vat “Ma do derheqê kesêkî de to rê çîyêkî bipersê. Parka nêzdîyê keyeyê şima de ma pêvînayîş bikerê û to rê karêkî pêşnîyaz bikerê.”
Hîcran Yildize îfade kerd ke wexto ke nêweşxane ra vejîyaye polîsan venga ci da ke şora qereqolî la seba ke nêşîya reyna ci rê telefon kerd. Yildize da zanayene ke qereqol de polîsan a berda odaya TEMî û tira pers kerd ke rewşa HDPyî senîn a, prosesê weçînayîşî de HDP do se bikero, paştî bido Îmamogluyî yan nê. Polîsan Hîcran Yildize rê pêşnîyazê ajanîye kerd, la aye qebul nêkerd.
Muhammed Baranî dîyar kerd ke polîsan tede pê telefonî qisey kerd û ci rê pere teklîf kerd. Baranî pare kerd ke şewe û roje WhatsAppî ser o polîsan ci rê gefî wendî û ajanîye ferz kerda. Polîsan Baranî rê vato ke ê do domananê ey bikişê.
Wird îdarekaranê HDPyî vat ke polîsan deynê înan, rewşa înan a banka, têgêrayîşê înan zanayêne.
