Platforma Yekitiya Jinên Kurd têkildarî 23 jinên kurd ên di hilbijartina parlamentoya Iraqê de hatin hilbijartin peyamek parve kir. Platformê di peyamê de jinên hatin hilbijartin pîroz kirin û got: “Em hêvî û bawer dikin ku jinên kurd li ser her çar parçeyan bibin yek û bi hêza jinê dengê kurd û Kurdistanê bilind bikin.”

Platformê di peyama xwe de wiha got: “Li ser her çar parçeyên Kurdistanê rol û mîsyona jinên kurd roj bi roj pêş dikeve. Ji rojava heta rojhilat, ji bakur heta, başûr jina kurd bûye sembola têkoşina azadiyê. Êdî li Kurdistanê û li cîhanê baş tê zanîn ku hêza jina kurd hêza veguhertina Rojhilata Navîn e. Jina kurd li her qadê dengê xwe bilind kiriye li civakê rengê xwe nîşan dide. Hêvî û baweriya me ew e ku ev hêz bibe hêza yekitiya jina kurd. Em hêvî dikin jin di nava çar parçeyan de dengê kurd û Kurdistanê bilind bikin. Hêviya me ew e ku armanca wan a herî yekem bibe yekîtiya jina kurd. Em ji bo jinên bi hestên kurdewariyê tev digerin serkeftinê dixwazin. Em wekî Platforma Yekitiya Jinên Kurd serkeftina parlamenterên jinên kurd pîroz dikin.”