Dr. Ekrem Karakaya par li Konyayê hatibû qetilkirin. Platforma Tenduristiyê ya Amedê di salvegera yekemîn de Karakaya bi bîr anî. Platformê li ber Nexweşxaneya Dewletê ya Selahattîn Eyyubî daxuyanî da û Dr. Ekrem Karakaya bi bîr anî. Pêkehateyên platformê tev li daxuyaniyê bûn û pankarta “Em dixwazin bijîn û bidin jiyandin” vekirin. Xebatkarên tenduristiyê ji bo qurbaniyên qada tenduristiyê deqîqeyek rêz girtin.

Seroka Odeya Bijîşkan a Amedê Elîf Tûran daxuyanî da û kuştina Dr. Ekrem Karakaya bi bîr xist û destnîşan kir ku di 20 salên dawî de kuştina xebatkarên tenduristiyê zêde bûye. Tûran anî ziman ku siyasiyên Tirkiyeyê xebatkarên tenduristiyê hedef nîşan didin û îktidar ji tundî û kuştina xebatkarên tenduristiyê berpirsiyar e. Tûran da zanîn ku heta ku pergala tenduristiyê neyê guhertin wê tundiya li qada tenduristiyê jî kêm nebe û ev pergala tenduristiyê pergala tenduristiyê veguherandiye cehenemê. Tûran anî ziman ku ji bo pêşî li tundiya li qada tenduristiyê bê girtin divê îradeyek polîtîk hebe û xebatkarên tenduristiyê dixwazin di şertên mirovî de bijîn û nexweşan bidin jiyandin.