‘Peymana Sedsalê’ ya serokê Amerîkayê Donald Trump bû sedema nîqaşan. Demildest serokê rêveberiya Filistînê Mehmûd Ebas bersiv da plana Amerîkayê û plan red kir. Ligel nîqaşan jî li çend bajarên Filistînê çalakiyên şermezarkirinê hatin lidarxistin.
Serokê Amerîkayê Donald Trump ligel serokwezîrê Îsraîlê Benjamîn Netanyahû li Qesra Spî civîneke hevbeş a çapemeniyê li dar xist. Plana xwe ya aştiyê ya Rojhilata Navîn ku weke “Peymana Sedsalê” bi nav dikir ragihand. Plana aştiyê 80 rûpel e û hem ji bo Îsraîlê û hem jî ji bo Filistînê hatiye amadekirin.
Trump di çarçoveya plana aştiyê ya Rojhilata Navîn de diyar dike ku dê Orşelîm-Quds wek paytexta yekparçe ya Îsraîlê bê qebûlkirin. Li gorî plana Trump dê ji bo Filistînê jî dewleteke serbixwe ku paytexta wê rojhilatê Orşelîm-Qudsê be diyar dike, lê der barê paytext dê kîjan bajar be tu agahî neda. Li gor plana aştiyê ya Rojhilata Navîn ji bo pêkanîna merca ku Filistîn bibe dewleteke serbixwe, pêvajoyeke 4 salî lazim e. Li gorî plansaziya Trump filistîniyên koçber dê biçin dewleta xwe ya di demên pêş de bê avakirin û dê li Îraîlê nemînin.
Çend îsraîlî erênî nêzî planê bû lê belê filistînî wê planê red kirin. Serokê rêveberiya Filistînê Mehmûd Ebas bertek nîşan da û got Quds-Orşelîm ji bo firotinê nîn e û dewleta Filistînê bêyî paytexa Quds-Orşelîm nabe. Ebas got: “Dê dawiya vê planê ne baş be. Jidestçûna Qudsê malwêranî ye. Ev planeke têkbirinê ye. Dê mijarê bibin dadgeha navdewletî.” Ligel aşkerekirina plana Amerîkayê li Xeza, Refah, Nablûz û Ramallahê bi hezaran kes daketin qadan.
