Hemsereka PJAKî Zîlan Vejîne arz ziwan ke Îran de vurîyayîşêko demokratîk lazim o û wina vat: “Ganî rejîm goş bido şaran û vurîyayîşî bîyaro ca. Şarê azerî, ereb, fars, belûcî û kurdî pîya sloganê ‘Ma paştî danê pê’ vanê.”

Hemsereka Partîya Cuya Azade ya Kurdistanî (PJAK) Zîlan Vejîne derheqê serewedaritişê Îran û Rojhelatê Kurdistanî de û derheqê deklarasyonê înan û KODARî de ANFyî rê qisey kerd.

Zîlan Vejîne îfade kerd ke şaranê Îranî cara tim bi waştişê vurnayîşê rejîmî sere wedaritêne la rejîmê Îranî tim bi şîdetî verê waştişanê şaran girewtêne. Zîlan Vejîne vat: “La nika şexsê Jîna Emînî de waştişê edalet, demokrasî, têduştî û azadîye yê şaranê Îranî ziwanan de yê. Serkêşîya cinîyan de şarî şexsê Jîna de wayîrê ameyoxê xo yê azadî vejîyenê. Çike welatêk de cinîyî azad nêbê çew azad nêbeno. Jîna kurdêke bîye yanî a merkezê serewedaritişê Kurdistanî ya. Serewedaritişî Kurdistanî ra dest pêkerd û vilayê pêro Tehran, Tebrîz, Belûcistan û Ahwazî bîyo.”

Vejîne qiseykerdişê xo rê wina dewam kerd: “Şarî û cinîyî vurîyayîşan wazenê la rejîm bi şîdetî cewab dano. Wina bawer kena ke şarî rixmê teda zî do apey gamêke meerzê. Îran de vurîyayîşêko demokratîk lazim o. Ganî rejîm goş bido şaran û vurîyayîşî bîyaro ca. Şarê azerî, ereb, fars, belûcî û kurdî pîya sloganê ‘Ma paştî danê pê’ vanê. Ganî rejîmê Îranî na raştîya şaran, komelan û cinîyan bivîno û goreyê ci têbigêro.

Ma çareserîya xo sey rayîr û xeta hîrêyine pênase kenê. Hêzê ke na xete temsîl kenê, bi  têduştî, demokrasî û azadîye wazenê û cephe û îtîfaqê azadî û demokrasî yê. Ma sey PJAKî û KODARî deklarasyonê xo weşanabî û çareserîye nîşan dabî. Ganî qanûno bingeyî yê welatî bingeyê krîteranê demokratîkan de newe ra bêro ercnayene. Estbîyayîş, nasname û pêro komelê etnîk, dînî û kulturelî yê Îranî ganî pê qanûnan bipawîyê. Ganî îdareyê herêmî awan bibê û heqê cinîyan pê qanûnan bipawîyê.”