Emîne Îpek a li Girtîgeha Girtî ya Jinan a Gebzeyê girtî bû, piştî 30 sal cezayê lê hatibû birîn bi dawî bû, îro hat tahliyekirin. Emîne Îpek di sala 1992’an de dema ku hê 18 salî bû li Dadgeha Ewlekariya Dewletê (DGM) hatibû darizandin û bi angaşta “endamtiya rêxistina terorê” 30 sal cezayê girtîgehê lê hatibû birîn.
Îpek, dema ku tê girtin wê dişînîn girtîgeha Xarpêtê û di dorê de wê dişînin girtîgehên Riha, Sêwas, Êlih û Çewlikê. Herî dawî jî îpek, di Girtîgeha Girtî ya Jinan a Gebzeyê de bû û ji wir piştî 30 salan hatiye serbest berdan. Di nava 30 salên xwe di zindanê de Îpek, tev li gelek çalakiyên grevên birçîbûnê bûye.
Bi kulîlkan hatiye pêşwazîkirin
Emîne Îpek piştî ku ji girtîgehê derket, li pêşiya girtîgehê malbata wê, aktîvîstên Tevgera Jinên Azad (TJA), Kongreya Demokratîk a Gelan (HDK), endamên Komeleya Jinan a Demê, Komeleya Piştevaniya bi Malbatên Girtî û Hikûmxwaran re (MATUHAY-DER) ên Marmarayê û endamên Înîsiyatîfa Dayikên Aştiyê ew bi coşeke mezin û bi kulîlkan pêşwazî kirin.
Hat zanîn ku Emîne Îpek piştî çend rojan bi malbata xwe re li Stenbolê bimîne wê biçe navçeya Pasûr a Amedê.
