Heme kesan seba pêvînayîşê dîyinî ra heyet çi eşkerayî dano bi kelacanî pawitêne. Labelê ana aseno ke yew çîyo newe çinî yo. Zatî mûcîze zî nêameyêne pawitiş. Çimkî hetê dewlete ra yew game nêerzîyaya. Dewlete hema zî şerê taybetî qilêrinî de israr kena. Eke dewlete nê warî de samîmî bibîyêne, verên ra hepsîyê nêweşî veradayêne û hêrişê Rojawanî nêkerdêne. Rojawan de hêrişî, operasyonê qirkerdişî, Vakûr de operasyonê sîyasî û eştişê qeyûman heme hetî ra dewam kenê. Nê warî de nameyê dewlete ra Bahçelî her roje birreno û sey pîleqaya xirabe xo dibare keno, tewş-tewş bi qiseyanê xiraban tahrîkan keno. La ewta de qet zereyê yew miqalekê samîmîyetî çinî yo. Heyetî ke Îmrali de Rayverê PKKyî Abdullah Ocalanî reyde pêvînayîş kerd, pêvînayîşê verênî de yew rewşa hêvî vejîyaye raşte. Nê heyetî partîyan reyde yew bi yew pêvînayîş viraşt. Sîyasetmedarê kurdan ê ke zîndan de yê înan reyde yew bi yew pêvînayîş viraşt. Netîce de heme kesî seba nê pêvînayîşan ra zaf memûn mendî û heme kesan zî pêvînayîşê dîyinî ra goşî hewanayî.
Pêvînayîşo dîyin
Nê warî de heyetê Îmrali di reyî eşkerayî daye û nê eşkerayîyan de heyetî vat ke “Dewlete ganî nê warî de game bierzo. Eştişê game çi yo? Ganî verên ra hepsîyê nêweşî û peyda pey heme hepsî serbest veradîyê. Dîyin zî rewşa qeyûman werte ra wedarîyo û nê warî de bingeyê demokrasî bivirazîyo. Tewr muhîm zî tecrîd werte ra wedarîyo. Eke tecrîd ana dewam bikero, çîyêk nêbeno. Eksê ci her roje operasyonê qirkerdişê sîyasî virazîyenê, rojnamegerî tepişîyenê û qeyûmî ser o qeyûm erzîyeno. Rewşa Rojawanî raşte de ya. Her roje qirkerdişê sîvîlan virazîyeno. Bendawa Tişrînî de her roja Homayî nêbo ke çeteyê SMOyî bombardûman nêvirazê. Nê bombardûmanan de sîvîlî, gedeyî, cenîyî, rojnamegerî û hunermendî yenê qetilkerdiş. Bi hewayêko eşkera bi destê çeteyan sûcê merdimîye yeno kerdene. Nê warî de sûcê nê şerî ra dinya temaşe kena. Neteweyê Yewbîyayeyî nê sûcê şerî ra xo kerr û lal kenê.
Qiseyê Bahçelî
Ma vînenê ke heyetî Îmrali de pêvînayîşo dîyin kerd û nê pêvînayîşî de yew çî nêvejîya raşte. Omer Çelîkî vat: “Hînê pêvînayîş qedîya û enkay ra pey heyet nêşono Îmrali”. Bahçelî zî eynî qiseyê xo yê qilêrinî dibare kerdî û vat: “Eke PKK çekan vera nêdo, ma do nê çekan sereyê înan de bişiknê”. Ana rewşe asena ke şerê taybetî yê qirêjî sewbîna çî pawito. No pawitiş zî ana ame vatene: “Ganî PKK bê şert çekan verado û ma zî înan efû bikê.” Seke na dewleta qirêje ne PKK sirasnayo, ne zî şaro kurd sirasnayo. Aqildayoxanê şerê taybetî seke tewreyê xo de nan û sole werda. Kurd hînê kurdo verên nîyo. Alavere û dalavere hînê pere nêkeno. Nê warî de hînê çokê dewleta tirke şikîyayê.
Statuyê Rojawanî
Şorişê Rojawanî hêvîya heme şaran a. Eke Rojawan bireso statuyê xo, heme şarî xelisîyenê. No sebeb ra zî ganî şaro kurd Rojawan de xêza sûre de israr bikero û heme hewar paştî bido. Kabeyê şarê kurdî Rojawan o. Ganî şar mergane dormeyê kabeyê xo bigîro û ey bipawo.
