La senî hewa yew çareserî? Devlet Bahçelî nişka verê meclîsî de destê DEM Partî tepişt û tira dime yew eşkerayîye daye û vat ke Serekê Şarê Kurdî wa bêro meclîs de koma DEM Partî de eşkerayîye bido û PKK tasfîye bikero. Tabîî nê vatişê Bahçelî wareyê pêroyî de yew gulbang da. Nê warî de çapemenîya tirkan xo bi xo eşkerayîya Bahçelî nîqaş kerde û sankî nê warî de dewlete Serekê Şarê Kurdî reyde pêvajoya çareserî ser o muzakere kerdo û xo mîyanî de pêameyîş viraşto. DEM Partî zî eşkerayîya Bahçelî ra paştî daye û vat ke Serekê Şarê Kurdî Abdullah Ocalanî ser o tecrîd wedarîyo û pêvajoya çareserî dest pêbikero. Nê mîjarî de desttepiştişê DEM Partî yew çîyo normal nêbî. Kora ra îcap kerd desttepiştişê Bahçelî? Nê warî de heme kesî mat mendî. Eşkerayîya dîyine de vatişê Bahçelî zaf rencîde bîyî û yew vatişo xirabe bî. Ewta de samîmîyet çinê bî û şaro kurd tahrîq kerd. Hînê badê zî wekîlê DEM Partî û birazayê birêz Ocalanî Omer Ocalanî, Ocalanî reyde Girawa Îmrali de yew pêveynayîş viraşt. Nê pêveynayîşî de eşkera bîbî ke verê coyî birêz Ocalanî reyde dewlete Serekê Şarê Kurdî reyde yew pêveynayîş nêviraşto. Nê warî de çapemenîya tirkan zî xo bi xo her roj niîqaşê xirabî virazena.
Vatişê Bahçelî de yew samîmîyet çinî yo. Teslîmîyet est o û xapênayîş est o. Çalakîya Anqara ra dime hêrîşê Rojawanî ra rewşa îmha û înkarî vejîyaye raşte. Na raya hîrêyine de zî Bahçelî ancî şow kerd û vat ke pirsgirêkê kurdan çinî yo û teror est o û birayîya kurdan ser o demagojî kerd. Seba eşkerayîya Bahçelî Serekkomar Erdogan çi eşkerayîye dano ame meraqkerdiş. Erdoganî zî meclîs de koma AKPyî de hewayê Bahçelî şow viraşt. Verê vat ke na komare komara heme kesan a û taybetî komara tirkan û kurdan a. Dime ra şaro kurd û DEM Partî tehdît kerd û gefî wendî û Bahçelî ra methîyeyî viraştî. Nê vatişê Erdoganî vatişê xirabî bîyî û vatişê şerê taybetî bîyî.
Mîyanê Îsraîl, Fîlîstîn, Lubnan û Îranî de yew şerê pîlî dest pêkerd. Nê warî de Rojhelatê Mîyanênî de ser newe ra sînorî yenê bedilnayîş. No sebeb ra zî bekaya dewleta tirke yew xewf girot û panîka tersîyayîşî virazîyaye.
No sebeb ra zî rewşa Bahçelî reyde planê şerê taybetî kewt dewre. Nê warî de eke Rojhelatê Mîyanênî de kereyê sînoran ser newe ra bibedilîyê, ewta de şaro kurd zî wayîrê yew statu beno. Ewta de ganî şaro kurd kaykerdişê kisikî de keraya hamleyê kisikî de weş kay bikero. Nê hamleyê kisikî de şaşî hînê nîna telafîkerdiş. Nê warî de Tevgera Azadî heyana ewro zaf ceribnayîşî dîyî û hînê xapênayîşê tirkan ra zaf ceribîyayî.
Eke yew çareserîya rûmetine virazîyena, kurdî rol û mîsyonê xo kay kenê. Tîfaqê AKP û MHPyî vera şarê kurdî neçar mend, hînê kayanê qirêjan ser o kayanê qirêjan virazeno. Şaro kurd hewayê her wextî nê kayanê qirêjan berteref keno. Hînê kurdî zî wayîrê statuyî benê. Heme hetan ra verê kurdan ra serkewtiş aseno. Hînê kurdî zî dinya de cayê xo yê rûmetinî gênê.
