Dirîyanê welatî rê…

Yeno qutê xo destê ma ra weno

Şino hakanê xo şarî rê keno,

Fekê ci ra şeker şerbet vareno

Zerra xo de dek dolaban çarneno,

Ezayî de dismalan helisneno

Mal û milkê yetiman tiraweno,

Vate de ti vanî şêr û piling o,

Eslê xo de tersoneko diling o,

Weşî û hîrayî de sergovend o

Hela tenge de ti vanî qey merdo,

Dawet û veyveyan de alef weş o

Sifreyê xo de bexîl û gelaş o,

Hêgayê şarî rê bezre û xulam o

Firêzeyê xo de nivil û tiral o,

Tebera vera her kesî kîbar o

Peyê beran de cinawiro har o,

Şeligî rê şaîr û zanaye yo

Kuncikê xo de yewo pernaye yo

Estorê zalimî rê zîn û palan o

Feqîr û bindestî rê pehlîwan o,

Sîyasetê xo de welatperwer o

Qey di qurişan teqleyan erzeno,

Xerîban rê sarnerm o sey mêşnayo

Qewmê xo rê sey vergê vêşanî yo,

Fetva dano ti vanî qey seyda yo

Ti nêvanî gilarzeyê zuran o,

Firtan dano xo rê berz ra fireno

La vayê sela simerî nêkeno,

Qatê kincan mîyan de payeberz o

Cemat û dîwanan de fekmalêz o,

Ca nêmendo zerd û pereyan deko

Dilqê ey ra ti vanî qey parsek o,

Dinya ra gêreno ziwanan zano

Rindîya welatî ça ra bizano,

Teorîk de çepgir û sosyalîst o

Pratîk de merdimwer û faşîst o,

Serdestan rê siware û esker o

Bindestan rê dimpiştik û tîrmar o,

Sempozyûm û panelan ra gêreno

Lewlêsê pasta û şimiteyan o,

Wayîrê doktora û mastirî yo

Cîranê korfehmî û nezanî yo,

Sereko wekîlo wezîfedar o

Pamendanê welatî rê deyndar o,

Neyaran rê sînaye û yaran o

Şinasî rê talo tirşo guzin o,

Qiseyî de robî û fedakar o

Meydanî de destteng û payeker o,

Espijan ser cigêrayîşan keno

Dormaleyê xo rê bêxem û lal o.

Çime: Umer Barasi, Dijeyê Pistanan, Weşanxaneyê Vateyî, Îstanbul, 2023, rr. 40-42.