10ê adara 2025î de mîyanê Mazlûm Ebdî û Serekê Demkî yê Sûrîye Ahmed El Şera de yew pêameyîş îmze bîyo.
Goreyê nê pêameyîşî, yew komîte yena awankerdiş û heşt maddeyan ser o xebitêna. Goreyê nê maddeyan kurdî zî benê hemparê heme çîyanê dewleta Sûrîye. Îdarekerdiş ra heta qanûnê bingeyî, ekonomîyê Sûrîye ra heta heme wareyanê cuye de kurdî benê hempar. Ez wazena ke maddeyanê nê pêameyîşî ser o vindera û çîyo ke mi nê maddeyan ra fehm kerdo wendoxan rê pare bikera.
1-SDG entegreyê hêzanê asayîşî yê sazîyanê Sûrîye beno. Ewta de aseno ke ordûyê SDGyî ordûyê Sûrîye mîyan de vila nêbeno. Yanî herinda “yew ordû” de, “ordûyo yewbîyaye” esas girêno. Goreyo ke mi fehm kerdo, kurdê Sûrîye benê ortaxê Dewleta Sûrîye.
2- Sûrîye de çi dîn beno û çi netewe bena, mîyanê heme prosesanê sîyasî û sazîyanê dewlete de bi hawayêko erkdar û seyyewbînan temsîl benê, heqê înan yo sîyasî bi qanûnê bingeyî yeno garantîkerdiş. Yanî ewta de tena seba heqê kurdan nê, heqê heme şaran, dînan û mezheban yeno garantîkerdiş.
3- Komelê kurdan komelo cayî yê Dewleta Sûrîye yo û hemwelatîya înan bi fermî yena garantîkerdiş. Sûrîye de verî nasnameyê kurdan qet nêhesibîyayêne. Kurdî bi na madde, se hemwelatîyê aslî yenê qebulkerdiş.
4- Heme cayanê Sûrîye de pêrodayîş dêno vindetiş. Yew het ra Dewleta Tirkîya û OSO hêrişê kurdan kenê, hinê ganî no hêriş bêro vindetiş. Yew het ra hukmatê HTŞyî gala elewîyan keno. Bi hezaran elewîyî qetil kerdê. Ganî no qetlîam bêro vindetiş. Yewna het ra durzîyan xoserî îlan kerda. Hewce keno ke bi rizaya durzîyan na mesela zî çarçewaya heq û huqûqî de çareser bibo. Semedo ke heme cayanê Sûrîye de aştîyêka mende û seyyewbînanî înşa bibo, heme meseleyî bi dîyalog çareser bibê.
5- Heme sazîyê sivîl û leşkerî yê Bakûr û Rojhilatê Sûriye, berê sînorî, teyaregeh, warê petrol û gaza xozayî entegreyê rayberîya Dewleta Sûriye benê. Çîyo ke mi fehm kerdo, goreyê na madde QSD û hukmato merkezî ko pîya nê cayan îdare bikerê. Ameyeyê nê beran zî ko pare bibo.
6- Sûrîyeyijê ke ca û warê xo ra ameyê teberkerdiş, ê ko biageyrê dewan û bajaranê xo û hetê Dewleta Sûrîye ra bêrê pawitiş. Bi taybetî sere de Efrîn, Girê Spî û Serêkanî ko azad bibê, ko şarê nê cayan biageyrê cayê xo, mal û milkê xo ko tepa bigêrê.
7- Têkoşînê Dewleta Sûrîye yê vera merdimanê Esad û heme talokeyanê asayîş û yewîya dewlete, yeno destekkerdiş. Ewta de merdimê Esadî û merdimê bînê ke vera rejîmê neweyî vejînê, ko pîya vera înan têkoşîn bêro dayîş.
8- Ma heme vatişanê nefret û têgerê vilakerdişê fitne û vengdayîşê ke dubendî dekenê mîyanê heme bîyayîşanê komelê Sûrîye, red kenê. Mîyanê hemwelatîyanê Sûrîye de hetê dînan, mezheban û neteweyan ra ganî cîyakerî çin bo, ganî mîyanê înan de seyyewbînanî bibo, ganî yewer nişno înkarê yewerî bikero.
27ê Sibate de Îmrali ra yew mesaj yeno. No mesaj de vajêno ke; wa PKK kongreya xo pêser bikero û xo fesh bikero. PKKyî zî no mesaj qebul kerdo û yew adirbest îlan kerdo. Semedo ke qerarê feshkerdişê bigêrîyo ganî meclîs no proses de yew însîyatîf bigêro, goreyê nê prosesî qanûnan vejo. Xora hem îqtîdar hem zî mûxalefet wazeno ke na mesela hinê çareser bibo. Ay wext meclîs hinê wa rolê xo kay bikero.
Rojawan de zî yew pêameyîş îmze bîyo. Rojawan de ko na mesela mîyanê yew serre de çareser bibo. Hem Başûr hem zî Rojawan de hima zî operasyonê leşkerî dewam kenê. No têger, têgerê prosesê aştî nîyo. Verê ganî hem zereyê Tirkîya de hem Başûr de hem zî Rojawan de hinê fek operasyonan ra verradîyo. Ganî fek operasyonanê sîyasîyan û tayînkerdişê qayyûman ra verradîyo. Ma wazenê ke na mesela hinê bin ra çareser bibo.
