No pêameyîş beno ke peynîya şerêko pîl o yo ke dewletî wazenê bîyarê meydan de bo; la tu çiyêk nêeşkeno vernîya na raştîye bigîro. Raştîya şerî do peynîya peyên de bivurîyo û bibo raştîya pêameyîşî
Hîkayeya tewr vêrîn a dinya şer-gur ser o bîye. Destano ke qala mêrdetî û pîltîya wextê xo kenê şer-gur girewtibî mîyanê xo. Ê rojanê verênan ra heta nika ma ke ewnîyenê dinyaya girde û dinyaya xo ya qije; ma vînenê çîyêko negatîf ser o ma ameyê afirnayîş, semedo ke ma başî bîyarê na dinya û heme çerxê negatîfî ma bişiknê…
No tespît paşta xo dano vatiş, nuştiş û resnayîşê hîkayeya afirnayîşê însanan ê dîn, kultur û mîtolojîyan. Gilgamêşî ra bigîrê Îlyada, Odysseîa, Îgor, Kalevela û heta destanê Kawa û sewbîna destanan; merdimayî mîyanê nê mît û destanan de bîyê û şer-gur semedê înan her tim merkezê cuye de bîya. Çîyo tewr ecêb no yo ke pêameyîş hedefê heme serdeman o. La ma wexto ke ewnîyenê tarîxê xo û ê pêro miletan ma vînenê ke tu wext pêameyîşêko raşteqîn nêameyo erdan ser. Tu destanan ra pey miletê ê wextî demêko derg nêbîyo wayîrê pêameyîşî; tu pêxemberan ra pey çew nêbîyo wayîrê huzurî û tu fîlozof, rayber, hukumdar nêeşkayî dinyaya ke pêameyîş ser o yo biafirnê.
Modernîteya serwere
Bi nê raştîyan ma verê xo bidê seserra 21ine: Heme dinya de alozî est a. Vera heme alozîyan de amacê viraştişê pêamîyêşêkê pêroyî est o. Eke ma biewnê nêzdîbîyayîşê nê amacî ra ma do fam bikerê ke her gama ke semedê pêameyîşî yena eştiş bingeyê xo de raştîya şer-gurî pawena; çunkî modernîteya ke na dinya de serwer a nêwazena pêameyîşêko raşteqîn bêro heme erdanê dinya ser o!
Çar parçeyê Kurdistanî
Na seserre de miletî û tay bawerîyî bîyê belayê modernîteya ke wazena heme çiyan ra feyde bivîna: nê belayan ra yew zî Kurdistan o! Kurdê wayîrê Kurdistanî bi heme cîyayîyanê xo mîyanê mît û destanê ke ma cor de nuştê de bîyê û şer-gur semedê înan her tim merkezê cuye de bîyo. Amacê înan zî sey heme qewman pêameyîş bîyo. Labelê Kurdistan ne Filîstîn ne zî Ukrayna yo; bisilman o, file yo, cihû yo, êzidî yo, elewî yo û zafziwan o! Rîyê nê cîyayîyan ra zî bîyo qurbanê zaf çiyan. 400 serran ra zêde yo ke erdê kurdan parçe-parçe yê; nêzdîyê 200 serrî yo ke kurdî zaf heqan ra dûrî visîyayê. Şer-gur bi waştişê înan nêvirazîyayo la pêameyîş her tim bîyo waştişê înan. Seserra 21ine de kurdî bi çend çiyê ke pêroyê dinya eleqedar kenê kewtê rojeva heme welatan; xebera mîlyaran însan kurdan ra çînî bîye. Newe newe kurdan şinasnayê û goş dayê waştişê kurdan ser o.
Têkoşînê Ocalanî
Kurdistan nika binê çar netewe-dewletan de yo; kurdî mîyanê 100 serranê peyênan de hetê nê dewletan ra raştê gelek çiyanê xiraban ameyê û vera nê xirabîyan de têkoşînê xo canêverda. Sayeyê nê têkoşînî ra nika parçeyêk de pergala federale girewtê xo dest û parçeyêka bîne de zî gêrenê ke bibê wayîrê pergalêka modern a dinya. Helbet no waştiş raştîya şerî dir rîbirî maneno. O yo ke keweno milê kurdan ser o zî israr û îqrar o. Kurdî vera raştîya şerî ke dewletê sey Tirkîya, Sûrîye, Îraq û Îran wazenê aver berê de sey la û derzîne xebetînî; wazenê xalîya ke bivirazî wa bibo xalîya şar û bawerîyan. Rayberê Şarê Kurdî Abdullah Ocalanî semedo ke na xalî weş bivirazîya û pêro merdimê ke Rojhelatê Mîyanênî de cuyenê tede ca bigîrî mucadele keno. Ocalan heme nêzdîbîyayîşanê dagirkeranê kurdan pûç keno û bi gamanê xo ke erzeno wazeno vernîya şer-gurî bigêro. Bi vengdayîşê xo yê 27ê sibate no îspat kerd.
Raştîya şerî
Amacê têkoşînê kurdan şer-gur ney pêameyîş o. Û nika zî semedê pêameyîşêkê pîlî kurdî bi rayberîya Ocalanî xo hedre kenê. Bi têkoşînê kurdan tarîxê xoverdayîşî ame nuştiş, kurdî bi waştişê xo yê pêameyîşî wazenê mohrê xo pirodê tarîxê pêroyê dinya ke tede pêameyîşêko daîmî nêameyo vînayîş. No pêameyîş beno ke peynîya şerêko pîl o yo ke dewletî wazenê bîyarê meydan de bo; la tu çiyêk nêeşkeno vernîya na raştîye bigîro. Raştîya şerî do peynîya peyên de bivurîyo û bibo raştîya pêameyîşî.
