Hêrişê dewleta tirke yê vera Sinûnî de domano 12 serre şehîd bî, 7 kesî zî dirbetin bîyî. Meclîsê Şingalî vat ke PDK û MÎTî Hewlêr de vera Şingalî tay planî kerdî.

Meclîsê Xoserîya Demokratîke ya Şingalî (MXDŞ) derheqê hêrişê vizêrinî yê vera Meclîsê Şarî yê Sinûnî de eşkerayîyêke daye û nê pare kerdî:

“Vera Şingalî hêrişê dewleta tirke hemkarê ci bi armancê çinkerdişê îrade û destkewteyanê şarî dewam kenê. Netîceya hêrişê dewleta tirke ya îşxalkere yê vera Meclîsê Şarî yê Sinûnî de domanê bi nameyê Selah Nasiro 12 serre şehîd bî û 7 kesî zî dirbetin bîyî ke nînan ra rewşa tay tenan giran a.

Dewleta tirke ya qirkere bi hemkarîya PDKyî, hukmat û artêşa Iraqî şarê Şingalî rê teda û zorbazîye kena. Seba ke nê nêresayî armancê xo raşta raşte hêrişê Şingalî kerd. Meclîsê Şarî yê Sinûnî tena xizmetê şarî kerdêne û sewbîna yew xebata ci çin a.

Nê wextê peyênî de PDK zaf reyî xîret keno ke Şingal de kaos vejîyo, Şingalî veng bikero û şarî Îdareyê Xoserî ra dûrî bikero. Bi nê hawayî PDK xîret keno ke Peymana 9ê Teşrîna Verêne bîyaro ca. Senaryoyê nê hêrişî zî hetê PDKyî ra ame amadekerdene. Dezgehê îstîxbaratî yê PDKyî Parastin û MÎT Hewlêr de roniştî û înan pîya vera Şingalî tay planî kerdî. Hêrişî ra dima zî senaryoyê înan dewam keno. Tay kesanê ke xo roto, xîret kerd ke provakasyonî bikerê û komelê ma bidê pêkewtene. Nê kesayetê ke xo sey mesuldaranê êzidîyan vînenê la pabesteyê PDKyî yê, hêrişê vera sivîlan meşrû kenê û xîret kenê ke verê hêrişanê neweyan abikerê.”