Başûrê Kurdistanî de “alozîye” dewam kena. Na alozîye bêşik xozayî nîya. Hêzê hemkarî hişmendane herême de şer vejenê. Çike şerî ra debara xo kenê. Şer nika xidaya hêzan o. PDK, dewleta tirke û DAÎŞ pîya têgêrenê, dewan tal kenê, cayanê cabîyayîşî danê bombayan ver û komelî tersnenê. PDKyî Başûr teslîmê artêşa tirke kerdo. Herême de facto ameya îşxalkerdene. Xeylêk cayan de baregeh, leşkergeh û nuqtayê kontrolî yê Tirkîya est ê.
Rojnameger Azîz Koyluogluyo ke Başûrî nêzdî ra taqîp keno derheqê serebûtanê peyênan, hemkarîya PDKyî bi dewleta tirke û rewşa şarî de tayê ercnayîşî kerdî.
Koyluogluyî armanc û hemkarîya PDKyî ser o nîya vat: “Tayê kesî vanê ke PDK bi qanûnê bingeyî yê Iraqî sey partîya sîyasî têgêreno, eşkeno her hetî reyde pêvînayîş bikero û hemkarîye awan bikero. Labelê nika têkilîyê mabênê PDK û dewleta tirke, reftarê PDKyî bi temamî cîya yê. Ma nêeşkenê vajê ke tîya de çarçewa dîplomasî de têgêrayîş est o. Seke zanîyeno dewleta tirke hemverê Başûrî nîsana 2022yî ra nata dest pê hêrişê îşxalî kerd û nê hêrişî de PDKyî reyde hemparîye viraşte. Bêguman na hemparîye, hemparîya îxanetî ya. PDK nika vera kurdan mîyanê îxanetê cidî de yo û seba rewakerdişê hêrişî her rayîrî şuxilneno. Bi taybetî organanê çapemenîya xo de propaganda keno ke no hêriş têna hemverê PKKyî yeno kerdene û Tirkîya Başûrî îşxal nêkena. Nê hewteyanê peyênan de ma vînenê ke hêrişî zêdîyayî. Seke ma zanê dewleta tirke xeylê wexto stratejîya “dekewe, pak bike û bimane” dîyar kerdbî. La artêşa tirke nêeşkaye dekewo û pakkerdiş de zî xeylêk zehmetîyan anjena. Tirkîya têna nêeşkena derûdormeyê gerîlayan bigêro. Seba nê, ganî PDK ci rê hetkarîye bikero. Yanî ganî bajaranê PDKyî ra hêrişî bêrê serûberkerdene. Nê hêrişê peyênî zî na çarçewa de virazîyenê.”
Hetkarîya PDKyî
Rojnameger Koyluogluyî ard ziwan ke PDK leteyê îşxalî bîyo û herêmanê xo dano xebitnayene. Koyluogluyî wina dewam kerd: “Nika ma vînenê ke hetê PDKyî ra vera gerîlayan hêrişî qewimîyenê. Pêkewtişê întensîfî est ê. Esasî artêşa tirke nika herême îşxal kerda. Dewan veng kena, kontrolanê rayîrî kena, rayîranê neweyan awan kena û kena ke qereqolan virazo. Dewleta tirke pêro nê çîyan bi hetkarîya PDKyî kena. Tîya de armanc îşxal o. Yew zî îşxalkerî wazenê aşmanê hamnanî bişuxilnê. Çike ê zanê ke gerîlayî baxusus hêrişanê hewayî de tayê zorîyan anjenê. Yanî wareyê têgêrayîşê gerîlayî teng beno.”
Çapemenîya PDKyî rewa kena
Koyluogluyî da zanayene ke artêşa tirke plan kena ke heta payîzî xeta Avaşîn, Metîna û Zapî de korîdorêkê newî abikero. Rojnamegerî derheqê nêzdîbîyayîşê şarê Başûrî de nê analîzî kerdî: “Şarê Başûrî vera nê hêrişan tebîî reaksîyonê cidî ramojneno. Têna Başûr de nê, heme Iraq de vera nê îşxalî reaksîyon est o. La nê reaksîyonî heta nika zêde rêxistinkî nêbîyî. Ma naye zî vajê. Şar zafane bi eşkerayîyan û fikran reaksîyonê xo mojneno. Tîya de bêşik rolê çapemenîye est o. Beşêkê çapemenîya Başûrî keno ke îşxalî normalîze bikero. Na çapemenîye gama ke xeberan dana, vana ke mabênê dewleta tirke û PKKyî de pêkewtişî est ê. Oxina ke mîyanê înan de pêkewtiş çin o. Eksê ci hêrişê artêşa tirke est o. Tirkîya bi teyarayan, helîkopteran, tankan û topan hêriş kena. Bi hezaran leşkerê tirkan hêriş kenê. Labelê tayê organanê çapemenîye de seke mîyanê PKK û dewleta tirke de pêkewtiş est o yeno şewqdayene. Na çapemenîye birastî hêrişê artêşa tirke rewa kena û serê îşxalî nimina. Xora PDKyî herêma xo de şar bêîrade kerdo û kesê ke vengê xo vejeno desinde bêtesîr keno.”
Xoverdayîş do qezenc bikero
Rojnameger Azîz Koyluogluyî ameyoxê şerî ser o nê şîroveyî kerdî: “Wina aseno ke artêşa tirke do pêro hezanê xo bişuxilno. Çike aye dest pê pêlê hêrişî yê hîrayî kerd. Heta peynîya payîzî no pêlê hêrişî do bi hetkarîya PDKyî bidomno. Tirkîya wazena îşxalî hîra bikero. Coka roje bi roje leşkeran û hêzan sewq kena. Şima zî zanê verê cû eşkera bî ke cergê DAÎŞî û cergê Sûrîye yê bînî herême de ameyî cakerdene. Nameyê înan bîla çapemenîye rê dîyayî teber. Name, peyname û fotografê înan çapemenîye de weşanîyayî. Reyna hêzê PDKyî yê Zêrevanî, Gulan û Roj herême de xeylê tevgerdar bîyî. PDKyî heme hêzê xo dekerdê xizmetê artêşa tirke. Bi mi çiqas ke xoverdayîş bî, şansê dewleta tirke yê serkewtişî tay beno. Heya ma nêeşkenê vajê ke dewleta tirke nêeşkena tayê cayan de cabigêro. Çike herême de sewqîyatê leşkeran û tevgerdarîya hewayî ya întensîfe est ê. Beno ke netîceya nê amadekarîyan de herême de do ca bigêro. La herême de eşkena mende bibo? No xeylê binîqaş o. Çike uca de xoverdayîşê gerîlayan est o û taktîkanê newîyan reyde dewleta tirke danê derbeyan ver. Ez vana ke xoverdayîş do qezenc bikero.”
