PDK yanî keyeyê Barzanîyan nêzdî 20 serrî yo Başûrê Kurdistanî îdare keno. Nê keyeyî de qetî kulturê demokrasî û “sîmbîyozî” çîn o. Endamê nê keyeyî pêro sazgeh û dezgehê herême girewtê binê serdestîya xo. Herême de pergala qebîla est a. Serekê qebîla ferman dano, ê endamê bînî anê ca. Bikilmî “emîrberîye” est a. Na qebîla kena ke şarî “bende” bikero. Barzanîyî xo sey “zadegân”, şarî zî “bendegân” hesibnenê. Pergala na qebîle de bêgûman ne huqûq, ne eşkerayîye, ne zî lîyaqat est o.
Başûrê Kurdistanî de “qanûnê daristanî” derbasdar o. Kam ke hêzdar o/a, o/a yeno/a îqtîdar û înan ê ke qels ê gêno/a binê bandora xo. Sîstemo winayên maneno awanîya ke bingeyê ci pêt nîyo. Eke erdlerzêk biqewimîyo, na awanîye cade rijîyêna. Keyeyê Barzanîyan ver bi hişarî şino û wazeno şarê Başûrê Kurdistanî zî xo dima bero. Herême de ercê Kurdistanî çîn ê, menfaetê keyeyê Barzanîyan est ê. Nê keyeyî Tirkîya, Amerîka û welatanê bînan de xeylêk sermayegozerîyî kerdê. Şîrketê ci est ê. Yew armancê Barzanîyan est o, o zî pawitişê “maldarî” yo. Nika homayê Barzanîyan “dolar” o.
Kolonîyê Erdoganî
Rejîmê Barzanîyan hem rişwetwer, hem dizd hem zî hemkar o. Seba ke mal û milkê xo bipawo, dewleta tirkan rê “dîzdarîye” keno. Mîyanê Başûrî de bi desan bargehê artêşa tirkan est ê. Şaristanî binê kontrolê îstîxbaratê tirkan de yê. Raşteraşt Başûr bîyo “kolonîyê” Erdoganî. Keyeyê Barzanîyan zî nê kolonî de “naîbîye” keno. Na bendegânîye bêşik mîyanê şarî de nêrazîbîyayîş afernena. Êdî şarê Başûrî verê na polîtîkaya teslîmîyetî de deyax nêkeno.
Mergê Cîhan Tehayî
Hukmatê PDKyî vera muxalîfan nê aşmanê peyênan metodanê gemarinan zî şuxilneno. Ma vajê Cîhan Tehayî îdareyê Barzanîyan xeylê rexne kerdêne. Çend rojî verî xebere dîyaye ke Cîhan Teha “şîyo heqîya xo.” No merg xeylê şikdar o. Selahîyetdaran eşkera kerd ke Tehayî 26ê teşrîna verêne de serê rayirê Barzanî yê Hewlêrî de qezayê trafîkî de xo kişto. Kesî na eşkerayîye ra bawer nêkerd. Bitaybetî keyeyê Tehayî hukmatî ra şik keno. Çike cade ame eşkerakerdene ke Tehayî xo kişto û dima ra ame defnkerdene. Nê gamê îdareyê PDKyî şik afernenê.
Delîlî nênê parekerdene
Wayê Cîhan Tehayî guman kenê ke a bi destê îdareyê PDKyî kişîyaye. Wayê ci fikrîyenê ke selahîyetdarî delîlan qestî pare nêkenê û serê serebûtî nimnenê. Waye Ceylan Teha reftarê hukmatî wina ercnena: “Her kes zaf hol zano ke rayiro ke serê ci de qeza qewimîyo de kamerayî est ê. Asayîş îdîa keno ke waya ma xo kişto, la heta nika no merg îspat nêkerdo. Ma sey keyeyî şik kenê ke waya ma ameya kiştene. Selahîyetdarî vanê ke aye xo kişto û wina nê serebûtî nimnenê. Ma şik kenê ke beno ke nê serebûtî de bêçika tayê selahîyetdaran est a. Eke bêçika ci çîn a, çira heta nika derheqê xokiştişî de delîlanê şênberan pare nêkenê?”
Keyeyê Cîhan Tehayî heta ke bireso raştîye, do têkoşîn bikero.
Rojnameger Suleyman Ahmet
Têna Cîhan Teha nê, rojnamegerê muxalîfî zî raştê tedaya hukmatê Barzanîyan yenê. Senî ke AKP vera çapemenîya azade hêz şuxilneno, KDP zî wina têgêreno. Mîsal edîtorê servîsî yê Rojnewsî Suleyman Ahmet seba cenazaya pîyê xo 1ê teşrîna verêne de Herêma Kurdistanî ra vejîya rayir û derbasê Bakur û Rojhelatê Sûrîye bî. Gama ke Suleyman Ahmet 25ê teşrîna verêne de agêra, Berê Sînorê Sêmalka de bi destê asayîşê KDPyî tepişîya. Na roje ra nata Ahmetî ra xeberêke nêgêrîna. Na çarçewa de avûkatê Suleyman Ahmetî Nerîman Ahmad her roje tayê hewldayîşan keno, labelê tu cewabêk nêgêno. Tewr peynî Asayîşê Duhokî rixmê bira dozgerîye destûr nêdano ke avûkat Suleyman Ahmetî reyde pêvînayîş bikero.
