Weçînitoxê Kurdistan û Tirkîya 14ê gulane de şîyî sînqodan. Şarî bi hêvîyêka girde rayê xo dayî. Êdî ameyêne pawitene ke îqtîdarê Erdoganî vîndî bikero. Labelê weçînayîşê serokkomarîye turê dideyinî rê mend. Weçînayîşê parlamenterîye de zî AKP û MHPyî oncîna zafêrîye girewte xo dest.
Weçînayîşî verî şîrketanê anketî tayê dayeyî weşanayî. Goreyê nê dayeyan weçînayîşê serokkomarîye turê dideyinî rê mendêne. Labelê Îtîfaqê Cumhurî parlamento de zafêrîya xo vîndî kerdêne. Yanî Partîya Çep a Keske, CHP û ÎYÎPî parlamento de zafêrîye girewtêne. Netîceya weçînayîşî de yeno vînayene ke xeylêk şîrketan “şaşîye” kerda. Eke welatêkî de şîrketê anketî wina bi hawayêkê girdî xeletîye kenê, uca de qetî “hîlebazîye” esta. Merdim nêeşkeno vajo ke pêro şîrketan seba muxalefetî “manîpulasyon” kerdo. Bi nê hawayî eşkera bî ke hîlebazîye xeylê gird a. Baxusus Kurdistan de ma raştê kayanê YSKyî yenê. Zaf şaristanan de rayê Partîya Çep a Keske ameyî derbaskerdene MHPyî. Xora anketan de rayê na partîya nîjadpereste û kanpereste sey se ra 6-7 dîyêne. Nê weçînayîşî de rayê ci bîyî se ra 10. YSKyî na hîlebazîye cayê xo de kerde. YSK hetêk ra hukmî temsîl keno, hetêk ra vera huqûqî têgêreno. Her dezgeh teslîmê seraya Erdoganî bîyo. Êdî ê barbarîye rê xizmet kenê. Demokrasî binê ninganê nê barbaran de yo. YSK îqtîdarê Erdoganî paweno. Yanî pawitoxê serdestîya “dizdan” keno.
Seccade ame şuxilnayene
Ganî yo ke muxalefetî hîleyî asteng bikerdêne. Weçînitoxan na babete ser o hem medyaya sosyale de hem zî kuçeyan de çend reyî “balantişî” kerdî. Oncîna heme partîyanê muxalefetî goşhîrayîye kerde. Xora kampanyaya weçînayîşî ya Kemal Kiliçdarogluyî destpêk ra binkewte bîye. Key ke vejîya raşteyan, xeletîyêka girde kerde. Şî cayêkî û uca de payna seccadeyî. Nê reftarî mabênê dormeyanê dîndaran de “guman” aferna. Çike nê dînamîkî xora CHPyî ra tersenê. Na partîye bi serran o mîyanê dîndaran de sey “partîya ateîste” yan “partîya ke îtîqatî qedexe kena” yena zanayene. Erdoganî na xeletîya Kiliçdarogluyî cade şuxilnaye. Raşteyanê weçînayîşî de destê xo de seccade kirişt û vat ke ê do 14ê gulane de serê seccadeyî de nimaj bikerê. Seba Kiliçdarogluyî bedelê seccadeyî giran bî. Erdoganî têna seccade nê, camîyî zî şuxilnayî. Ma bîyarê xo vîrî ke Erdogan şî camîyê Sultan Ahmetî û uca de mîtîngêkê weçînayîşî kerd. Tayê camîyan de hem propagandayê AKPyî ame kerdene hem zî posterê Erdoganî ameyî daliqnayene. Mîsal Bursa de camîyê Ahmet Daî de posterê Erdoganî daliqîya. Xora Erdoganî ge-ge raşteyan de vatêne ke “ê têna Homayî ra ferman gênê.” Yanî o oncîna beşdarê “hîle-î şerîyye” bî. Dizdiye kerde, bêrayirîye kerde, komel verda pê, xo rê serayî viraştî û milkê xo zêdîna; dima ra îtîqat şuxilna û pêro sucê xo nimitî.
Nasname dîyarker bî
Nê weçînayîşî de nasname û îdeolojî bi hawayêkê aktîfî ameyî gurenayene. Eşkera bî ke rixmo ke krîzo ekonomîk û erdlerz qewimîya, şarî weçînekê xo nêvurna. Êdî mabênê şarî de çarçewa nasnameyî de dişmenîya girde esta. Îqtîdarê Erdoganî hem na dişmenîye ramite hem zî bi serran şuxilnaye. Nê weçînayîşê peyênî de zî “dişmenîye” dîyarker bîye. Eke welatêkê bînî de krîzo ekonomîk o winayên bibîyêne, eke welatêkê bînî de erdlerzo tesîrdar o winayên bibîyêne, qetî hukmat ameyêne cezakerdene. Labelê Tirkîya de hukmatê Erdoganî rê “dîyarîye” dîyaye. Şar êdî bom bîyo. Melankolîyî derûdormeyê şarî îşxal kerdo. Mezgê tayê weçînitoxan êdî nêxebitîyeno. Tirkîya nika açarîyaye “timarxane”.
