Partiya Çepên Kesk û HDP’ê têkildarî 1’ê Îlonê Roja Aştiya Cîhanê bi daxuyaniyekê banga mîtînga 1’ê Îlonê ya li Qada Îstasyona Amedê kirin û xwest her kes beşdarî mîtîngê bibin.
Partiya Çepên Kesk û Partiya Demokratîk a Gelan (HDP) bi boneya 1’ê Îlonê Roja Aştiya Cîhanê li Şaxa Odeya Endezyarên Madenê ya Amedê daxuyaniyek dan. Hevserokên Partiya Çepên Kesk Pinar Sakik Tekîn û Abbas Şahîn, Hevserokên HDP’ê Gulistan Atasoy û Zeyad Ceylan, rêveber û endamên sazî û dezgehên sivîl başdarî daxuyaniyê bûn. Rêveber û nûneran di daxuyaniyê de pankarta “Em ji bo aştiya civakî jiyaneke wekhev û azad ava dikin” daliqandin. Hevserokê Partiya Çepên Kesk Abbas Şahîn daxuyanî da. Şahîn anî ziman ku gelek mirovên bi komî li kelekan siwar dibin, noqî avê dibin û di ava behrê de dixeniqin. Ev hemû encama polîtîkayên dewletan e. Her roj xweza tê qirkirin û talankirin. Kesên li dijî qirkirina xwezayê disekinin rastî astengiya hêzên dewletê tên. Gelek herêmên Kurdistanê ên wekî Cûdî, Gabarê daristanê dişewitînin û talan dikin. Êdî zagonên xwe jî nas nakin. Welat kirine girtîgeh. Zagonan jî bo diz, tacîzkar û tecawuzkaran derdixin û wan serbest berdidin.”
Şahîn, herî dawî destnîşan kir ku dê di 1’ê Îlonê de li Qada Îstasyonê ya Amedê mîtîngê li dar bixin. Şahîn bang li hemû sazî, rêxistinên civakî û kesên aştî û demokrasiyê dixwazin kir ku di 1’ê Îlonê de beşdarî mîtîngê bibin.
