Konferansê Kurdan ê 17. yo ke Parlamentoyê Ewropa de ame organîzekerdene de rewşa Tirkîya, têkoşînê kurdan, problemê Rojhelatê Mîyanênî û nêzdîbîyayîşê Ewropa ameyî nîqaşkerdene.

Konferans de semedê kesanê ke erdlerzê 6ê sibate de dinayaya xo bedilnaye rêz ame girewtene.

Endamê Îtîfaqê Azadî yê Hewzan/Ewropa fransayij François Alfonsî bale ante hêrişê îşxalî yê dewleta tirke yê vera Kurdistanî ser û vat herra kurdan de rewşe zaf xirab a.

Endama Heyetê Rayberdişî yê EUTCCyî Dr. Dersim Dagdelene zî erdlerzê 6ê sibate ard vîrî û vat beno ke no erdlerz peynîya Erdoganî bîyaro. Dagdelene bale ante hêrişanê vera Rojawanî ser û vat dewleta tirke tim huqûqê mîyanneteweyî binpay kena. Dagdelene vist vîrî ke wextê erdlerzî de zî Tirkîya herêmê kurdan dayî bombayan ver û vera bêvengîya mîyanneteweyî nêrazîbîyayîş mojna. Dagdelene ard ziwan ke kurdî Ewropa de zî yenê kiştene û hîrê aktîvîstê kurdê ke Paris de ameyî qetilkerdene ardî vîr. Dagdelene vat: “Semedê demokrasîyê Rojhelatê Mîyanênî ganî PKK lîsteya terorî ra bêro vetene. Wayîrê Jin Jiyan Azadî nêeşkenê bêrê krîmînalîzekerdene.”

Hemsereka Yewîya Huqûqnasan ê Ewropayijan yê Semedê Dinya de Demokrasî û Heqê Merdiman (ELDH) Barbara Spinelli zî waşt wa tecrîdê serê Rayberê Şarê Kurdî Abdullah Ocalanî bêro wedaritene û vat ganî CPT raporê xo eşkera bikero û tedbîrî bêrê girewtene.

Avûkatanê Abdullah Ocalanî ra Razîye Ozturke zî vist vîrî ke xoverdayîşo ke hetê Abdullah Ocalanî ra dîya destpêkerdene ewro bi Jin Jiyan Azadî dewam keno û vat: “Gama ke babete bena Abdullah Ocalan Ewropa huqûqê xo binpay kena. Dezgehê mîyanneteweyî vera tecrîdê Îmraliyî goreyê huqûqî tênêgêrenê.”