Hemvervatoxa Komîsyonê Heqanê Merdiman û Huqûqî yê HDPyî Nuray Ozdogane ard ziwan ke ê Weçînayîşê 14ê Gulane rê amade yê û wina vat:  “Ma venga pêro rayaumûmîye, muxalîfan, demokratan û şarê xo danê ke vera provokasyonan hişyar bibê, pîya têbigêrê û prosesê weçînayîşî de sey îtîfaqê demokrasî bixebitê.”

Ozdogane verî wina qisey kerd: “14ê nîsane de Riha de hemserekê ma zî tede 12 kesî, Stenbol de endamê meclîsê ciwanan zî tede 16 kesî, 25ê nîsane de Amed de 143 kesî ameyî destbendkerdene. Nînan ra 5ê ci avûkatî û 4ê ci rojnamegerî 48 kesî ameyî tepiştene. Reyna 26ê adare de namzeda Partîya Çep a Keske tepişîyaye. 27ê nîsane de Mûş de xeylêk kesî û 29ê nîsane de reyna 19 kesî ameyî destbendkerdene. 3yê gulane Roja Çapemenîya Azade de 2 rojnamegerî zî tede 5 kesî tepişîyayî. 29ê nîsane de polîsan hêrişê konvoyê ma kerd û 3 embazê ma derb kerdî. 30ê nîsane de 4 xebatkarê partîya ma tepişîyayî. Reyna dima vizêr Hemserekê ESPyî zî tede 7 kesî tepişîyayî. 1ê gulane de namzedê ma Omer Faruk Gergerlîoglu û Eylem Kayaoglu binê çimdarîya polîsan de raştê heqaret û şîdetî ameyî. 2yê gulane de 32 endamê ma yê meclîsê ciwanan ameyî destbendkerdene. 2yê gulane de hêrişê vera standê ma de 3 embazê ma birîndar bîyî.”

Ozdogane bale ante polîtîkaya binkore ya AKP-MHPyî ser o û wina vat: “Têna menga peyêne de 295 kesî ameyî destbendkerdene û nînan ra 61 kesî tepişîyayî. Îqtîdarê AKP-MHPyî arefeyê weçînayîşan de operasyonê qirkerdişê sîyasîyî zêdînayî. AKP-MHP netîceya weçînayîşan ra terseno. Wezîrê Karanê Zerreyî Suleyman Soylu weçînayîşê 14ê gulane sey ‘darbe’ pênase kerdî. Seba asayîşê weçînayîşan ganî cade Soylu erkî ra bigêrîyo. Reyna Erdogan û partîgîrê ci bi zelalî qiseykerdişanê xo de qala mudaxeleyê weçînayîşan kenê. Eşkera yo ke îqtîdar pê operasyon û hêrişan peyê provokasyonan de yo. Îtîfaqê Kede û Azadîye verê nê provokasyonan de hişyar o. Ma weçînayîşanê 14ê gulane rê amade yê. Ma do nê weçînayîşan de têna rayanê xo ney rayanê pêro partîyan bipawê. Ma venga pêro rayaumûmîye, muxalîfan, demokratan û şarê xo danê ke vera provokasyonan hişyar bibê, pîya têbigêrê û prosesê weçînayîşî de sey îtîfaqê demokrasî bixebitê.”