Hêzên Operasyona Ewlehiya Domdar a Gelan li bajarê Hesekê der barê operasyonê de daxuyanî dan û ev agahî parve kirin:
“Di çarçoveya şerê berdewam ê li dijî rêxistina DAIŞê ya terorîst de, û li ser bingeha erkên xwe yên exlaqî û neteweyî yên ji bo gelê Sûriyeyê, bi hemû pêkhateyan û li her deverê, Hêzên Sûriyeya Demokratîk (HSD), Hêzên Ewlekariya Hundirîn ên Bakur û Rojhilatê Sûriyeyê, û Yekîneyên Parastina Jin (YPJ) îro sibehê operasyoneke berfireh bi navê “Ewlehiya Domdar a Gelan” li çend taxên bajarê Hesekê dest pê kirin. Di operasyonê de bi ser gelek veşartgehên şaneyên terorîst ên DAIŞê de hat girtin û çend torên terorîstan hatin hilweşandin.
Ev operasyon piştî wê yekî pêk hat ku rêxistinê tevlihevî û valehiya ewlehiyê li gelek hrêmên çolê û hundirê Sûriyeyê, bikar anî û li erdnîgariya Sûriyeyê tevgera wê zêde bû. Lewma êdî ew herêm ketibûn bin destê wan şaneyên terorîs û dixwestin li herêmên din jî belav bibin, bi taybetî li Bakur û Rojhilatê Sûriyeyê, ku girtîgeh û kampên ku terorîst lê dimînin hene.
Li ser erdê, ev operasyon bû bersiveke pêşwext li dijî hewldanên rêxistina terorîst ên ji bo ji nû ve rêxistinkirin û avakirina şaneyên terrorist, ji bo pêkanîna êrişan li ser girtîgehên ku endam û lîderên wê lê dimînin, bi taybetî li bajarê Hesekê. Agahiyên îstîxbaratî yên hêzên me û hêzên hevkar, eşkere kirin ku rêxistin hewl dide Hesekê veguherîne navendeke êrişên xwe yên terorîst, bi taybet li taxên nêzîkî girtîgeha Sînaa û li derdora bajêr. Vê operasyonê careke din ew hewldan têk bir.
Di nava 14 saetan de operasyoneke berfireh pêk hat, zêdetirî 3 hezar şervanên jin û mêr tevlê bûn. Hêzên operasyonê hemû armancên xwe pêk anîn, 51 terorîst girtin, di nav wan de terorîstên ku tevlî êrişên li ser sivîlan û navendên ewlehî û xizmetê bûn hene. Di operasyonê her wiha torên terorîst ên xeternak hatin hilweşandin, di nav de yên ku plan dikirin êrişan li ser girtîgeha Sînaa û Kampa Holê bikin, û xeteriya wan a li ser sivîlan û aramiya herêmê ji holê rakirin.
Di operasyonê de her wiha embarên çek, cebilxaneyê û lojîstîkê yên şaneyên terorîst hatin desteserkirin:
50 Kalaşnîkov
155 Cercûrên Kalaşnîkovan
16 Demance
16 Cercûrên demanceyan
1 BKC bi cebilxane
5 Bombeyên destan
3 Bêtêl
3 Tifingên Brno
Hijmarek guleyên Kalaşnîkovê
Hijmarek alavên leşkerî û cilên ku di êrişên terorîstî de hatine bikar anîn.
Pêkanîna operasyonê gaveke pir girîng bû ji bo xurtkirina ewlehî û aramiya herêmê. Lê belê em ê her dem tevgerên biguman bişopînin û operasyonên têkibirina terorê di hemû aliyan de bidomînin. Em ji ber hevkariya wan bi hêzên ewlekariyê re û tevlîbûna wan a çalak ji bo pêkanîna armancên operasyonê, spasiya pêkhateyên Hesekê dikin û soza xwe ya parastina ewlehiyê dubare dikin.”
