Rêxistina Partîya Demokratîke ya Şaran (HDP) Stenbolî Meydanê Şîşhanê yê Beyogludî de hêrişê vera kurdan ê ke demo peyên de zêdîyayî de şermezar kerdî. Pîya parlementerê HDPyî temsîlkaranê rêxistinanê komelê sîvîlî zî paştî daye eşkerayîye.

Hemserekê HDPyî yê Stenbolî Erdal Avciyî ard ziwan ke rîyê polîtîkaya îqîtîdarî ra nê hêrişê nîjadperestî bi hewayêkê organîzekerdeyî yenê kerdene û vat: ”Eşkerayîya Walîtîya Konya hêrişê nîjadperestî sey meşru rajneno la mesele têna meseleya Konya nêya.”

Parlementera HDPyî ya Amedî Dersîm Dage zî ard ziwan ke bi polîtîkayanê leyminan hêrişê vera kurdan yenê rayraberdene û vat: ”Kurdî hinî dost û dişmenê xo hole nas kenê. Êyê ke înan qetil kenê nas kenê. Eke qetilkera hukmat nêyo wa hesabê nê hêrişan biperso.”
Serekwekîlê Koma HDPyî Saruhan Oluçî vat: ” Dewlete vera hêrişanê Ewropa vengê xo vejena la tîya şima qey bêveng ê? Almanya de nazî faşîst la êyê ke hêrişê kurdan kenê, şima nîjadperest nêyê? Wezîrê Teberî ti vanê qey ti nîjadperest nêyê? Heme dinya şima vînena. Şima qet biney nêşarmîyenê? Pê nê hêrişan sûco pîl yeno kerdene. Peynîya nîjadperestîye zîhnîyetêko qirkerdox o. Nê hêrişan de sûcê nefretî, sûcê merdimîye, sûcê kiştişê merdîman, birîndarkerdiş, teşebusê mergî, zirardayîşşê malî, çokdayîşî estê. Gama ke nê sûcî benê hukm se keno? Dozgerê ke tim partîya ma rê fezlekê şawenê şima hay ça? Hêrişkaranê kurdan rê şima dîyarîya bêcezayîye danê. Coka hêrişî dewam kenê.”

Oluçî diyar kerd ke rîyê polîtîkaya hukmatî ra hêrişê vera kurdan zêdîyenê û vat: ”Ziwanê şima yo ke haştîye komelkî xeripneno, dişmenîya şima ya vera kurdan axû vila kena. Îqtîdar komelî cêser fîneno. Berzeyê dişmenîye nano ro. Ganî îqtîdar hîşê xo bîyaro pêser. Hesabo sîyasî yê poltîkayanê ci do giran bo. Hêrişê ke ewro vera HDP û kurdan benê eke vera nînan tewiro qerardar nêro girewtene rewşe do xirabêr bibo.”