Hemsereka HDPyî ya Kerboranî Yuksel Oguze bale ante girîngîya 25ê Teşrîna Peyêne û wina qisey kerd: “25ê Teşrîna Peyêne ra dima heta weçînayîşanê herêmîyan têkoşînê cinîyan ma do berz bikerê, weçînayîşan de ser bikewê û cinîyî ancî do îdareyanê herêmîyan de cabigêrê.”
Yuksel Oguze tedayanê dewlete yê vera cinîyan ê kurdan ser o wina vat: “Tim verê bînaya ma de wesayîtê polîsan est ê. Polîsî her kombîyayîş, zîyaretanê ma û pêvînayîşanê ma teqîb kenê. Polîtîkayê teda û şîdetî bi taybetî vera cinîyan yenê caardene. Prosesê xoverdayîşê xoîdarekerdişî ra dima bi taybetî tedayî zêdîyayî. Dewlete hêzê cinîyan ê rêxistinbîyayeyî ra tersena. Bi taybetî cinîyê ciwanî hedefê polîtîkayanê şerê taybetî de yê. Ma do vera nînan çalakîyanê 25ê Teşrîna Peyêne de heta ma ra bêro xo biresnê cinîyan ê ciwanan û înan tewrê têkoşînê rêxistinbîyayeyî bikerê.”
Yuksele da zanayene ke Kerboran de şuxilnayîşê madeyanê narkotîkî zêdîyayo û ê bi taybetî vera ney kombîyayîşan kenê. Yuksele vat: “Çarçewa polîtîkaya şerê taybetî de şuxilnayîşê madeyanê narkotîkî yeno vilakerdene. Hetê bînî ra rêxistinê sey TUGVA binê nameyê têkoşînê vera narkotîkî de xo resnenê cinîyan ê ciwanan û nînan ancenê xo kişte. Ma vera nê xîretan zî kargehan do virazê.”
Yuksel Oguze pê hesna ke qeyûmî Mêrdîn û qezayanê ci de hêrişê destkewte û dezgehanê cinîyan kenê. Yuksele vat: “25ê Teşrîna Peyêne ra dima heta weçînayîşanê herêmîyan têkoşînê cinîyan ma do berz bikerê, weçînayîşan de ser bikewê û cinîyî ancî do îdareyanê herêmîyan de cabigêrê.”
