Serekê PKKyî Abdullah Ocalan bi serrano girawa Îmrali de têkoşînêkê bêsînorî keno. Armancê ey awankerdişê azadî yo. Coka sinifê kanperestî û şovenîstî yê Tirkîya Ocalanî rê teda kenê û ey rê “tecrîd” ferz kenê. Nê sinifê serdestî eynî wext de heqanê merdiman zî binpay kenê. Hem keye hem zî avûkatanê Ocalanî heta nika seba pêvînayîşî çend reyî muracat kerd, la înan rê destûr nêdîya.
Nêzdî 32 aşmî yo ke Ocalanî reyde pêvînayîş nêvirazîyeno. Vera na bêedaletîye welatanê bînan de zî nêrazîbîyayîş qewimîyeno. Na çarçewa de Swîs de “Seba Azadîya Ocalanî Komîteya Swîsî” ronîyaye. Parlamentoyê Swîsî ra tayê parlamenterî zerreyê na komîte de xebatan kenê. Înan ra yew Beppe Savary-Borîolî yo. Savary-Borîolî heman wext de doktorê xelisnayîşî yo. Ey derheqê tecrîd û têkoşînê Ocalanî de rojnameyê ma rê tayê ercnayîşê balkêşî kerdî.
Parlamenter Savary-Borîolîyî bale ante tecrîdê Ocalanî ser û wina vat: “Tecrîdê Abdullah Ocalanî standardê heqa mîyannetewî û heqanê merdiman ê esasîyan binpay keno. No suc o. No suc derheqê weşîya psîkolojîk û fîzîkî ya tepişteyî de eşkeno tayê probleman biaferno. Labelê kes çîn o ke seba nê sucî mesuldaran rê ceza bido.”
‘Komel çimanê xo padano’
Savary-Borîolîyî îfade kerd ke komelo mîyannetewî peygoşîye keno û nê ercnayîşî pare kerdî: “Komelo mîyannetewî vera problemê tecrîdî çimanê xo padano. Sultan Erdogan endamanê komelê mîyannetewî gêno binê bandora xo. Bi no hawa komelo mîyannetewî ey hêrs nêkeno.”
Persa kurdan de rolê Ocalanî
Parlamenter Savary-Borîolîyî yew zî persa kurdan de rolê Abdullah Ocalanî ser o fikrê xo beyan kerd. Ey ard ziwan ke seba çareserîya persa kurdan Ocalan wayîrê cayêkê girîngî yo. Savary-Borîolîyî wina qisey kerd: “Zîndan de bîyayîşê Ocalanî ne seba çareserîya persa kurdan ne zî Rojhelatê Mîyanênî de seba awankerdişê aştîye feydedar nîyo. Vernîya ma de nimûneyêke est a. Afrîkaya Başûre de Nelson Mandelayî rolêko muhîm kaykerdbî. Hem fonksîyon hem zî têgêrayîşê ey zanîyeno.”
‘Ocalan şerwanêko gird o’
Savary-Borîolî qala têkoşîn û qerardarîya Ocalanî zî kerd. Ey wina vat: “Abdullah Ocalan şerwanêko gird û qerardar o. O seba ke têkoşînê xo rê dewam bikero, hewcedarê paştîdayîşê ma yo.”
