Neteweyên Yekbûyî (NY), der barê lehiya ku hefteyeke berê li bajarê Dernayê yê rojhilatê Lîbyayê rabû de daxuyaniyek da. Li gorî daxuyaniya NY’yê ku xwe dispêre agahiyên Heyva Sor a Lîbyayê, di lêhiya li bajarê Dernayê de 11 hezar û 300 kes jiyana xwe ji dest dane.
Nivîsgeha Koordînasyona Kar û Barên Mirovî ya Neteweyên Yekbûyî, da zanîn ku her wiha hê 10 hezar û 100 kes jî winda ne û bi lêgerîn û rizgarkirina welatiyan re tê texmînkirin ku hejmara miriyan zêdetir bibe.
NY′yê der barê rewşa dawîn a li bajar de jî ragihand ku li bajar aloziya ava vexwarinê derketiye û bi kêmanî 55 zarok ji ber vexwarina ava qirêj bi jehrê ketine û piştî hefteyekê jî hê rewşa mirovî li bajar xirab e.
