Aşma teşrîna verêne de 4 serebûtê dejdayoxî qewimîyayî. Dînamîkê kurdî û dormeyê demokratîkî marûzê teda û qetlîyaman mendî.
Raver akademîsyene û rojnamegere Nagihan Akarsele Silêmanî de ameye qetil kerdene. Key ke cenazaya Akarsele ameye Tirkîya, polîs û leşkeranê tirkan seba ke merasîmê cenaza nêro kerdene astengîyê girdî kerdî. Kesê ke şîyî merasîm yan ameyî destbendkerdene yan zî astengkerdene. Heta muxabîrê Ajansê Mezopotamya Firat Can Arslan û muxabîra JinNewsî Dîlan Babate ameyî destbendkerdene. Bi nê reftarî rejîmê Erdoganî mojna ke qetlîyam de bêçika ey esta.
Çekê kîmyewî şuxilîyayî
Nagîhan Akarsele ra dima herêmanê Zap, Avaşîn û Metîna de 17 gerîlayî ameyî qirkerdene. Artêşa tirke nê qetlîyamî de vera gerîlayan çekê kîmyewî şuxilnabî. Xora ê herêman de nêzdî 2 serrî yo çekê kîmyewî û bombayê qedexeyî xebitîyenê. Rixmo ke Rêxistana Qedexekerdişê Çekanê Kîmyewîyan (OPCW) şuxilîyayîşê çekanê kîmyewîyan dî, vera Tirkîya tênêgêraye. Yanî komelo mîyanneteweyî bêveng mend.
Kitab malper ra wedarîya
Sereka Konseya Merkezê Yewîya Tabîbanê Tirkan (TTB) Şebnem Korur Fîncanciye derheqê şuxilîyayîşê çekanê kîmyewîyan de hîsgêrîya girde mojnaye û waşt ke cigêrayîş bêro kerdene. Eşkerayîya Fîncanciye rayaumûmîye ser o tesîro gird kerd. Hukmatê Erdoganî cade waşt vengê aye bibirno. Bi nê hawayî eşkerayîye ra tepîya Fîncanci tepişîyaye û medyaya hukmatî de ameye “terorîzekerdene”. Nîjadperestîye hende vila bîye ke D&Rî kitabê Bejan Maturî yo bi nameyê “Peyê Koyî rê Nîyadayîş” malpera xo ra wedarit. Çike no kitab kitabgehê Fîncanciye de estbî. Çapemenîya ke nêzdîyê hukmatê Erdoganî ya de kitab sey “kitabê rêxistine” ame nîşandayene. Têna kitab nê, tayê guleyê ke keyeyê Fîncanciye de bîyî zî ameyî nîqaşkerdene. Oxina nê guleyî babî û kalikê aye ra mendbî.
Vera rojnamegeran îşkence
Terorê dewlete nê serebûtan ra dima dewam kerd. 12 rojnamegerê Ajansê Mezopotamya û JinNewsî ameyî tepiştene. Polîsan vera înan şîdet şuxilna. Rojnamegerî marûzê kelemçeyanê peykîyan mendî û ci rê îşkence ame kerdene. Ame zanayene ke dewleta tirke waşt înan ra “terorîst” viraza. Cergê ke dewlete îdare kenê bi nê operasyonan û destbendkerdişan guneyanê xo niminê. Şarê tirkî rê mîzansenê winayênî mojnenê ke wa şar vajo dewleta xo vera “terorîzmî” têkoşîn kena.
Hukmat û mixalefet
Komara Tirkîya awankerdiş ra nata polîtîkaya xo ya cîyakere û qirkere de qet cîyayîye nêkerde. Senî ke îdareyê Mustafa Kemalî Qoçkirî, Agirî û Dêrsim de kurdî qetil kerdî û çekê kîmyewî şuxilnayî, nika zî polîtîkaya winayêne xebitîyena. Seba ke kurdî wayîrê heqanê xo nêbê û ameyoxê xo dîyar nêkerê, çi ke destê dewleta tirke de esto yeno kerdene. Hem hukmat hem zî mixalefet çarçewa na polîtîka de yewbînî rê paştî danê. Vera azadîya kurdan dînamîkê kanperestî, nîjadperestî û kolonyalkerdoxî her tim hemkarîye awan kenê.
