Rayberê Şarê Kurdî di çarçoveyê paradîgmaya xo ya modernîteya demokratîke û neteweya demokratîke de bi manîfesto û nexşerayê aştî û azadî ya seserre de adirbest îlan kerd û qerarê çek ronayîş û feshkerdişê PKKyî da. Çar parçeyanê Kurdîstanî de heme şarê kurdî û PKKyî vat ke “ma paştî danê rayberê xo, bê şik û bê guman qerarê rayberê xo pêk anê”.
Rayberê Şarê Kurdî di na manîfestoya xo ya Aştî û Civaka Demokratîke de feshkerdişê PKK û ronayîşê çekan bi şertê ka girê da. Vat qabê ke di pratîk de çekronayîş û feshkerdişê PKKyî pêk bêro, hewceyo ke dewlete raya sîyaseta demokratîke akero û qanûn bikero.
Roca verêne fîna her raye tay kesan femkerdiş û manadayîşê manîfestoya Rayberê Şarê Kurdî de zehmetîyî antî. Kewtî binê bandora vateyanê şerê taybetî yê çapemenîya hewze. Tayê kesê ke bi nîyeto nebaş nizdî bîyî, nêwaşt fam bikerê. La badê cû ame vînayene ke nexşerayê seserre di cîhan de veng da û Neteweyanê Yewbîyayeyan ra bigere heme giregirê rayedaranê dewletanê cîhanî qîmet da nexşerayê seserre, hema ro xo arqelyayî. Ame vînayene ke na manîfesto de tenê azadî û xelasa civaka kurde çin a, xelase û azadîya heme civakan, azadî û xelasa dewleta tirke û heme cîhanî est a. Hewceyo ke ma nêkerê xo vîr ra ke yê xurt eşkenê qalê aştî bikerê û aştî bipawê.
Di nexşerayê Rayberê Şarê Kurdî de çîyêko newe çin yo. Çîyo ke adirbestê yewinî yê 1993î ra nata vato, reyna ey vano. Qabê qedênayîşê şerê çekdarî û akerdişê raya sîyaseta demokratîke reyna şansêkî dano dewleta tirke. Heke dewleta tirke nê şansê tarîxî raşt biwano û baş bikar biyaro û hişmendîya xo ya nîjadpereste bibedelno, do heme Rojhelatê Mîyanênî ser o bandore bikero. Do bibo pêşengê Rojhelatê Mîyanênî. La heke fina her rayan reyna bêbextîye bikero û xo nêbedelnayîş de israr bikero, do bi aqûbetêkê zaf xirabî ra rîbirî bimano.
Qabe aştî û demokratîkbîyayîşê Tirkiya çiyo ke kewt ser milê Rayberê Şarê Kurdî û PKKyî ame caardene. Nika dora gameeştişî ya dewlete ya. Çimê heme şaran û dewletanê cîhanî dewleta tirke ser o yê. Rayberê Şarê Kurdî bi nê nexşerayê xo yê seserre vat ke qabê tifaqê stratejîkî yê tirk û kurdan û awankerdişê biratîya raştîne ez hedre ya. Nika dewleta tirke ya do şert û mercanê xebat û cuya Rêzdar Abdullah Ocalanî baş bikero û hêrîşanê xo yê ser Rojava û Başûrî vindarno û vaco ez hedre ya, sîyaseta xo ya qirkerdiş û çinêkerdişî bibedelno, yan zî do çimanê heme şaran û dewletanê cîhanî de teşhîr û mehkûm bibo. Di etya de ma muhîmî û giranîya stratejî û manîfestoya seserra Rayberê Şarê Kurdî vînenê.
Rayberê Şarê Kurdî bi na manîfestoya xo xoverdayîşê şarê kurdî nêqedêneno, tenê bedelneno. Ray û raybazanê xoverdayîşî bedelneno. Nexşerayê xoverdayîşê serdemî yê newî û pawitişê destkewteyanê 40 serran eşkera keno. Qedênayîş nîyo, destpêkê serdemêkê newî yo. Rayberê Şarê Kurdî di tarîxê xoverdêrîya xo ya 52 serran de bi hemleyanê xo yê tarîxî yeno şinasnayîş, na hemleya peyêna ke nê hemleyanê tarîxîyan ra yew a.
Tenê bi verwendan paştîdayîşê Rayberê Şarê Kurdî û Nexşerayê ey bes nêkeno. Ya ke kuna ser milê ma heminan, qabê serkewtişê nê nexşerayê seserre her timî zêdetir xebat a. Hewceyo ke hemi wextan zêdeyî ra ma bixebetê û qabê awankerdişê aştî û pergalêkê demokratîkî ser dewleta tirke gameeştiş ferz bikerê. Ma bi xebata xo ya civakî dewlete neçar bikerê ke gaman bierzo, şert û mercê xebate û cuya Rayberê Şarê Kurdî baş bikero. Ma hêrişanê dewleta tirke yê ser Rojava û Başûrî teşhîr û mehkûm bikerê û vindarnê. Bi kilmî ma destûr nêdê dewleta tirke reyna bi qederê heme şaran kay bikero.
Belê kurdî û rayberê xo di aştî de israr kenê la eno nîno a mana ke do tarîxî xora ders nêgerê û qarşî bêbextiyan hişyar nêbê û tedbîranê xo nêgerê. Kurdî wayirê vîrêkê xurtî yê. Di ê vîrî de qarşî bêbextiyan bêtedbîrî û bê xo pawitişî de mergê xo vînenê.
