Newroze ser o ma şîkînîme di xeta de eşkera kîme. Ey juyine;
Mesela Kawayî mîtolojîk a. Destan kî zaf cayî yo.
Ey didîne; xeta tabîeti ser o bifikirîme. Ma bikilmekîye qalê nê Destanî bikîme. Welatê Kurdan de paşayêk bîyo. Hermanê ey ser o çîyo xirab peyda beno. Kermî kilikê paşay ro wejîye. Hêkîme ke binê emrê paşayî der ê xeber dano ci. Nê derdî rê çare dozkerî.
Na mesele ser o hekîmê welatî benê kom. Nê derdî ser o mucûlîye kenê. Bimunaqeşe qerar danê ci. Dermanê xo kî; her roj mezgê domanê des û çar sereyî bidê nê kermî. Wa zor nêdê paşayî. Bi nê qaydeyî heyatê xo dewam bikero.
Nê welatî de keso ke dora xo ameye qederê xo rê beno razî. Tayê remenê koyan. Bi nê qaydeyî koyan de zaf kesî yenê têhet. Roje ra roje dore yena keyeyê Kawayê Asinkarî. Lajêk ci wazenê. Razî nêbeno…
Asinkar şono koyan. Peşmala xo bi ala, bi xortanê asîyan, erzeno saraya paşayî ser o. Textê ey paymal kenê. Welatêde azad awan kenê. Ey didîne; xeta tabîeti ser o bifikirîme.
Zimistan xelesîya. Aşma gujige ra dime adare yena. Usar bicemreyan tê dima benê rêze. Cemraya verêne ginena hawayî ro. Tije endî germîya xo dana rîyê hawayî ra. Cemra didîne ginena awe ra. Vewre helîyena, awî herekîyenê. Awe awzen her ca de xo keno eşkera. Cemra hîreyine; ginena hardî ra. Şenatîya hardî ebe gul û sosinan dar û pelan, vaş û marşingî, pun û sungî, kengerî û jajik, ribês û helige, mendik û talik, so û heliz usn.
Mal û dawar, varekî û bizêkî nîşanê usarîyî. Çukê reşî, leylegî tepîya nêmanenê. Hard û ware ra ca bi ca belekîya sîyaye zergunîya pel û puşî perena rîyê însanî. Werte honde şenatîye roja newîye û zergunîye roşanê Newroze de yenê têlewe. Azad û fîrazîye dar û dinya de çinay honde da tê dest? Koyan de roştîya mermolî, deşt û duzî, merg û hegayan da tê dest.
Nîşangah û zîyareta çila roştî danê.
Vêşanan kenê mird.
Rutan rê, kinc û kolan danê pira.
Azebî û xortî mirad wazenê.
Temê kal û pîran ogito pîl o.
Şanikê erîş sipya ma rê reyber ê.
Newroz roja newî ya.