Bi milyonan Kurd li çar parçeyên Kurdistanê, bi dirûşmeya “bijî Serok Apo” daketin qadan û bi coşa herî mezin agirê Newrozê geş kirin û li dora agirê Newrozê govend gerandin. Kurdên ku nêzî 10 rojan li qadan Newroz pîroz kirin, daxwaza azadiya fizîkî ya Rêberê Gelê Kurd Abdullah Ocalan û çareseriya demokratîk a pirsgirêka kurd anîn ziman.
Îsal pîrozbahiya Newrozê ewil di 12ê Adarê de li Navçeya Lice ya Amedê cihê ku PKK lê hatiye damezirandin geş bû. Bi vê yekê peyama ‘Agirê ku PKKê ji Kawayê Hesinkar dewir girtiye û geş kiriye; li çar parçeyê Kurdistanê û cîhanê belav dibe û bêtir geş dibe’ da cîhanê. Newroz piştre li bajarên Bakurê Kurdistanê, Başûr, Rojhilat û Rojava li çar parçeyên Kurdistanê belav bû û tîna xwe da bajarên Tirkiyeyê jî.
Bakur ji bo azadiya Ocalan bûn yek
Îsal Newroz li ser Banga “Aştî û Civaka Demokratîk” a Rêberê Gelê Kurd Abdullah Ocalan, bi dirûşmeya “Rêbertiya Azad Civaka Demokratîk” li 89 navendên bakurê Kurdistanê û Tirkiyeye ji aliyê milyonan kurd û dostên kurdan ve hat pîrozkirin. Agirê Newrozê ewil li navçeya Lice ku 47 sal berê PKK lê hatibû damezirandin bi girseyî hat pîrozkirin. Agirê Newrozê ku li Licê pêket; pêtên agir li navçeya Xalfetî ku Rêberê PKKê Abdullah Ocalan lê ji dayik bûye belav bû û li Sûrên Amedê û Keleha Kedîfekale ku Rahşan Demîrel bi canê xwe Newroz geş kir, bilind bû. Agirê Newrozê heta 20ê Adarê li 59 bajar û navçeyên bakurê Kurdistanê hilbû û di 21ê Adarê de li Amedê pêtên agir derket lûtkeyê. Di pîrozbahiyên li Wan, Êlih, Riha, Gever, Cizîrê de tevî şertên hewayê jî bi sed hezaran mirov daketin qadan û bi coşa herî mezin li dora agir kom bûn û bi dirûşmeyan û govendê girêdana xwe ya bi Rêberê PKKê Abdullah Ocalan re anîn ziman. Bi şev bi hezaran welatî li tax, gund û navçeyan bi agirê meşaleyan şev ronî kirin û daxwaza azadiya fizikî ya Rêber Abdullah Ocalan anîn ziman. Bi roj jî bi deh hezaran daketin qadan û peyamên aştî, azadî û demokrasiyê dan raya giştî ya cîhanê.
Bi şevê gel bi agirê Newrozê şev ronî kir û sembolên xêz kirin peyam dan cîhanê. Bi taybetî li Wanê Tevgera Jinên Azad bi meşaleyan remza Ala PKKê xêz kirin û tariya şevê bi ala PKKê ronî kirin. Dîsa li taxa Koyîçî ya Wanê bi hezaran mirov kom bûn û li dora posterê Abdullah Ocalan ê mezin agir geş kirin û li dora agir û posterê Abdullah Ocalan govend gerandin.
Bi agir Ala PKKê xêz kirin
Komek aktîvîstên Tevgera Jinên Azad (TJA) di 14ê Adarê de li navçeya Tûşbayê bi dirûşmeya “Bijî Serok Apo”, “Newroz pîroz be”, “Jin, jiyan, azadî” postere Mazlum Dogan rakirin û bi meşaleyan Stêrk xêz kirin û jinan bi meşaleyên destê xwe li dora stêrka ji agir çembera agir çêkirin û ala PKKê xêz kirin. Jinan bi vî wêneyî mohra xwe li Newroza 2025an xist.
Posterên mezin ên Ocalan vekirin
Di şeva 15ê Adarê de jî bi hezaran welatî li Taxa Koyîçî bi hezaran welatî kom bûn û Newroz bi coşeke mezin pîroz kirin. Girseyê di pîrozbahiyê de posterê Rêberê Gelê Kurd Abdullah Ocalan vekirin û bê navber dirûşmeyên “Bijî Serok Apo”, “Bijî Newroz” û “Newroza te pîroz be ey Serok Apo” berz kirin. Girseya li dora agir û posterê Ocalan govend gerandin û stran gotin.
Jinan bi meşaleyan ruh dan Sûrên Amedê
Di şeva 14ê Adarê de, jinan di pêşengtiya TJAyê de kom bûn û bi meşaleyan li sûrên Amedê yên dîrokî Newroz pîroz kirin. Aktîvîstên TJAyê li ser bircên Ben û Senê yên Amedê yên dîrokî bi meşale û erbaneyan Newroz pîroz kirin. Jinan bi meşaleyên Newrozê û erbaneyan ruh û reng dan Sûrên Amedê.
Di Newroza Amedê de jî nêzî 1 milyonek mirov ji Amed û bajarên derdorê berê xwe dan qadê û li dora Agirê Newrozê ji Abdullah Ocalan re azadî xwestin. Li qadê posterên Rêber Abdullah Ocalan hatin vekirin û li ekrana mezin wêneyê Abdullah Ocalan hat nişandan. Dema wêneyê Abdullah Ocalan di ekrana mezin de hat nişandan, ji denge wî peyama Newrozê hat guhdarkirin. Dema peyama Ocalan a Newrozê ya berê hat xwendin girseyê bi yek dengî dirûşma “Bijî Serok Apo” berz kir û girêdana xwe ya bi Rêberê PKKê Abdullah Ocalan re anîn ziman. Nûnerên partiyan jî slavên xwe ji Rêber Abdullah Ocalan re şandin û azadiya fizikî ya Abdullah Ocalan xwestin. Nûneran destnîşan kirin ku çareseriya demokratîk bi azadiya fizîkî ya Abdullah Ocalan ve girêdayi ye.
Piştî 21ê Adarê agirê Newrozê di 22 û 23ê Adarê de jî, Edene, Mêrsîn, Îzmîr, Stenbol jî di navde li 29 bajarên Tirkiyeyê geş bû. Li Stenbolê jî bi sed hezaran mirov kom bûn û daxwaza azadiya fizîkî ya Rêberê Gelê Kurd Abdullah Ocalan anîn ziman.
Rojhilat reng da Newrozê
Rojhilatê Kurdistanê di pêşwazîkirina Cejna Newrozê û hatina sala nû ya Kurdî de, pêşenge. Newroza îsal jî reng û coş da pîrozbahiyan. Gel bi agir re bû yek û tev li govendê bûn.
Li Rojhilatê Kurdistanê jî bi hefteyan e Newroz hat pîrozkirin. Newrozên herî bi coş û rengîn li Rojhilatê Kurdistanê hatin pîrozkirin. Li Rojhilatê Kurdistanê jî bi sed hezaran mirov li gelek navendan kom bûn û Newroz pîroz kirin. Ji Mako, Urmiye, Bokan, Sine, Seqiz, Hewraman, Kirmaşan, Îlam û dehan navendên Rojhilatê Kurdistanê Newroz pîroz kirin. Li van bajaran agirên mezin pêxistin û bi cilên neteweyî ruhê kurd û Kurdistanê dan van Newrozan.
Li Rojhilatê Kurdistan meheke çalakiyên pîrozbahiyên Cejna Newrozê tên lidarxistin. Tevî derxistina astengiyan ji aliyê rejîma Îranê ve jî, bi deh hezaran Kurd beşdarî pîrozbahiyên Newrozê bûn. Li Rojhilatê Kurdistanê her sal ji destpêka meha Adarê heta dawiya heman mehê bi boneya destpêka sala nû ya Kurdî û Cejna Newroza Kurdan çendîn çalakî, sema, govend û şahiyên girseyî tên lidarxistin.
Newroza Urmiye deng veda
Li bajarê Ûrmiyeyê yê Rojhilatê Kurdistanê bi deh hezaran kesên ku li qada pîrozbahiya Cejna Newrozê kom bûn, agirê Newrozê pêxistin û cejna sersala Kurdî pîroz kirin. Girseya bi coş a gel li dora agirê Newrozê govend girtin û dirûşmeyên “Jin, Jiyan, Azadî” û “Newroz Pîroz be” berz kirin. Gelê Urmiyê li navenda Urmiye û 8 navendên girêdayî Urmiye bi ruh û kelecana mihrîcanê agirê Newrozê bilind kirin û ji sibehê heta êvarê li dora agir govend gerandin.
Mexmûr bû remza Başûr
Li Başûrê Kurdistanê jî bi taybetî li Mexmûr, Şengal, Qendîl, Silêmanî û gelek navendên din Newroz bi coş hat pîrozkirin. Mexmûr bi pîrozbahiya şevê ya bi meşaleyan ruh da nexyeya Kurdistanê û bala cîhanê kişand ser xwe.
Li Mexmûrê nexşeya Kurdistanê
Agirê Newroza îsal li Wargeha Penaberan a Şehîd Rûstem Cûdî (Mexmûr) hate pêxistin û xwendevanan jî bi meşaleyan kareografiya nexşeya Kurdistanê û meşaleyakê di dirêjiya 150 metre hat xêzkirin. Xwendevanên Mexmûrê ji bo pêxistin agirê Newrozê û pîrozkirina cejan Newrozê, vê êvarên bi meşaleyên xwe rengê Mexmûrê guhertin. Xwendevanên dibistana navîn li tepeyê pişt wargehê meşaleyên xwe pêxistin û berê xwe dan saheya 4ê Nîsanê. Xwendevanên dibistan amadeyî bi meşameyan kareografiya nexşeya Kurdistanê û meşaleyekê xêz kirin. Dîmenê nexyeya Kurdistanê ku bi şevê xêz kirin mohra xwe li Newroza başûrê Kurdistanê da. Piştî pêkanîna kareografiyê, agireke mezin hat pêxistin û li derdora agirên Newrozê govend hat girêdan.
Şengal
Xelkê Şengalê bi gelê xwe yê Êzidî û Ereb îro cejna Newrozê bi şahiyekî pîroz dikin. Di şahiyê de peyama Rêberê Gelê Kurd Abdullah Ocalan a li ser Newrozê hate guhdarkirin û Rêveberiya Xweser a Şengalê jî daxwaz kir ji her demê zêdetir têkoşîn ji bo azadiya fizîkî ya Rêber Apo were dayîn.
Qendîl
Di şeva 20ê Adarê de bi sedan ciwan û jinên ciwan bi meşaleyan li Qendîlê meşek lidarxistin û agirê Newroza îsal pêxistin. Di meşê de bê navber dirûşma ‘Bijî Serok Apo’ berz kirin. Di saetên şevê de bi sedan ciwanên Kurd bi meşaleyan li Qendîlê weke kevneşopiyekê meşiyan û agirê Newroza îsal pêxistin. Di meşê de ciwanan bê navber dirûşmên dilsoziya bi Rêberê Gelê Kurd Abdullah Ocalan re anîn ziman.
Helebce/Keladizê/Silêmaniye
Li Silêmaniyê bi dirûşma ‘Agirê Newroz Ronahiya Rêya Bîra Nû ya Sala Kurdî ye’ agirê Newrozê li Girê Mameyare ya Silêmanî hate pêxistin. Wek kevneşopiyekê dîsa li girê Mameyare ya Silêmaniyê bi tevlîbûna gelek kesî û çalakiyên hûnerî yên Kurdî bi dirûşma ‘Agirê Newroz Ronahiya Rêya Bîra Nû ya Sala Kurdî ye’ agirê hate pêxistin û Newroz hate pîrozkirin.
Li pêşiya Rêbeberiya Giştî ya Rewşenbîrî û Hûnerî ya Helebce agir hate pêxistin û Newroz hate pîrozkirin. Welatiyên tevlî şahiyê bûn gotin ku divê Newroz bi geş û gur bê pîrozkirin.
Xelkê Qelediz û derdorî wê jî agirê Newrozê pêxistin û Newroz pîroz kirin. Di saetên êvarî de li navçeya Qeledizê ya ser bi îdareya Raperîn bi pêşengtiya serokê şaredariyê li Girê Husnî agirê Newrozê hate pêxistin.
Agirê 11 bajaran li Rojava gihişt hev
Li 11 bajarên Bakur û Rojhilatê Sûriyê û Helebê hemû bawerî, civak û rengên cûda li dora agirê Newrozê bûn yek û piştgiriya xwe ya felsefeya Rêberê PKKê Abdullah Ocalan a civaka demokratîk û yekîtiya gelan nîşan dan.
Agirê Newrozê li Bakur û Rojhilatê Sûriyeyê şeva 20ê Adarê geş bû. Di heman şevê de li dehan navendan agirê Newrozê bi hevre pêket û şev ronî kir. Xelkê bajarên kantona Cizîrê (Dêrik, Girkê Legê, Çilaxa, Tirbespiyê, Qamişlo, Amûdê, Dirbêsiyê, Til Temir û Hesekê), bajarê Kobanê yê kantona Firatê, kantonên Reqa û Tebqayê û taxên Şêxmesûd û Eşrefiyê yên Helebê agirê Newroêz hatin pêxistin û şahî hatin lidarxistin.
Di 21ê Adarê de jî şahiyên Newroza 2025an li seranserî Herêma Bakur û Rojhilatê Sûriyeyê û bajarê Helebê dest pê kirin. Bi sed hezaran welatî li 11 bajaran kom bûn û Newroz pîroz kirin. Girseya şêniyên Bakur û Rojhilatê Sûriyeyê bi coşeke mezin û bi dirûşma “Azadiya fîzîkî ya Rêber Abdullah Ocalan garantiya Sûriyeya demokratîk e” berê xwe da 11 qadên Newrozê yên Qamişlo, Dêrik, Gundê Hilêq ê Girkê Legê, Tirbespiyê, Amûdê, Dirbêsiyê, Hesekê, Reqa, Tebqa, Kobanê û Helebê.
Qadên bajar û bajarokên Herêma Bakur û Rojhilatê Sûriyeyê bi rengên Newrozê, wêneyên Rêber Abdullah Ocalan û alên xwecihî hatin xemilandin. Di şahiyan de bi hezaran şêniyên ji hemû beşên civakê û pêkhateyan bi cil û bergên xwe yên folklorî û neteweyî beşdar bûn. Di Newroza îsal xelkê tevahî herêmên cuda yên Sûriyeyê beşdar bûn û nîşan da ku rihê hevgirtina gel pir xurt e.
