Serra 2016î nata Kurdîstan de polîtîkaya qayûmî yena caardene. Hema hema 150 hemşaredarî wezîfe ra gerîyayî û herinda înan de yan walîyî yan zî qaymeqamî ameyî tayînkerdene. Îqtîdarê despotîk û otorîterî îradeyê şarî bi hovî xesp kerd. Destê şarî ra heqê weçînayîş û weçînîyayîşî ame xespkerdene. Şaredarîyê kurdan rixmê pêro teda û zextan xebatanê xo domnenê. No hewte Hetkara Hemşaredara Peyasî Gulîstan Nazliere derheqê polîtîkaya qayûmî û tedayanê dewleta tirke de tayê ercnayîşî kerdî.
Nazliere vat ke polîtîkaya qayûman yewna Sêrt de kewte dewre û nê ercnayîşî kerdî: “Ma vera polîtakaya derbekere xerîb nîyê. 2016î ra nata ma derbeyanê qeyûman reyde rî bi rî manenê. Qayûm derbe, xesp û talan o. Qayûm dizdîye û qirkerdişê îradeyê şarî yo. Ma vera şaredarîyanê DEM Partî tayînkerdişê qeyûman qebûl nêkenê. La çi heyf ke AKP îradeyê şarî xesp keno û butçe talan keno.”
‘700 kesî kar ra erzîyayî’
Nazliere qiseykerdişê xo rê wina dewam kerd: “Bêguman na polîtîka tena xespkerdiş û talan nîyo. Polîtîkaya qayûmî heme hucreyanê komelî de hewayê vîrûsî vila bîya. Şarê ma hewayê her wextî 31ê adare de îradeyê xo beyan kerd û badê zî ma dî ke qayûman çiqas taxrîbat viraşto. Qayûman verî sazîyê cinî û gedeyan xesp kerdî. Dime ra kedkar û xebatkarê welatperestî kar ra vetî û herinda înan de heme merdimê xo girotî. Eke ma nimûne bidê, Qayûmê Peyasî 700 kesî kar ra eştî û herinda înan de rixmo ke hewce nêkerdêne, merdimê xo yê bêwesfî girotî kar.”
Sera 70î xebatkaran apey gêrîya
Nazliere dîyar kerd ke weçînayîşanê herêmî ra dima ê seba xebatkaranê ke kar ra erzîyayî ser o xebitîyayî û nê xebatkaran doza karî qezenç kerde û wina qisey kerd: “Ma sera 70î zafêr apey girotî kar. Eynî wext zî ma şaredarîya komelkî esas genê. Tewr muhîm ma ercanê şarî yê kulturkîyan danê ciwîyayîş. Ma goreyê hewcedarîyanê şarî heme kesan esas genê. Goreyê paradîgmaya ma îdareyê herêmî berhemardişo ekolojîk û azadîya cinîyan ser o awan bîyî. Weçînayîşanê 31ê Adare ra dima ma bi taybetî sazîyê ke qayûmî înan ser o zaf taxrîbat viraştbî, ser newe ra akerdî. Nê sazîyan ra Xalxalok newe ra akerd. Uca de bi kurmancî, zazakî û tirkî perwerde dîyeno. Seba ke ma ser newe ra xo serûber bikerê, polê newîyî akerdî. Yew zî kreşê Perperîke bînaya xizmetî ya şaredarîye de abî. Ma nê kreşî de kurmancî, zazakî û ziwanê tirkî reyde perwerde danê.”
Kitabxaneyê eseranê cinîyan
Hetkara Hemşaredare Nazliere da zanayene ke kultur û folklor ser o xebatê înan ê erjayeyî zî est ê. Aye nê şîroveyî kerdî: “Wareyê tîyatro, kultur û muzîkî de xebatê ma est ê. Mîsal ma hîrê taxan de şarî reyde keye bi keye gêrayî, serrneweyê şarî bi çoş fîraz kerdî û moral da şarî. Sewbîna konserî kerdî. Ancî zî ma newe ra mudirîyetê cinîyan saz kerd. Heme hetan ra xebatê perwerdeyî yê psîkolojîkî dewam kenê û cayê pawitişê cinîyan akerdî. Seba eseranê cinîyan kitabxane akerd. Bi hezaran serrî yo ke heqê cinîyan xesp bîyo û înkar bîyo. Ma wazenê ke newe ra rewşa cinîyan başêr bikerê û cinîyanê ciwanan rê perwerde bidê. Her roje cinîyê ciwanî û sewbîna sazîyî kitabxaneyê eseranê cinîyan zîyaret kenê. Seke zanîyeno heyana ewro xeylêk cinîyî qetil bîyî û ma semedê nameyê înan cinîyan reyde darî ronayî.”
Xebatê ekolojîkî û spor
Nazliere îfade kerd ke ê kenê ke mîyanê komelî de têduştîye bivirazê û wina vat: “Seba xebatanê ekolojîkan dewan zîyaret kenê û dewijî ma reyde toxim ronenê. Ma nika ra pey şitil ronenê û ronayîşê bostanan hîna zaf kenê. Heme tewr daranê fîkî ronenê û şarî reyde pîya kenê. Yew zî ma seba ke Parka 8ê Adare zerar dîyo, newe ra virazenê. Wareyê sporî de hopê ma yê padayeyî est ê û ma nê hopî newe ra kerdî aktîf. Nê hopan de gede, cinî û camêrdî perwerdeyê asnawekerdişî genê. Paradîgmaya ekolojîk û demokratîke heme hetan ra domîyena. Hînê şar polîtîkaya qayûmî nêsirasneno û musade nêkeno. Çike şar kokanê xo ser o newe ra şîn beno û cuya xo ramino.”
