Navê Jîna Emînî ya ku di sala 2022yan de ji aliyê hêzên Îranê ve li Tehranê hat kuştin wê li eywana konferansa Mala Gel bê kirin.
Herwiha ji her du eywanên din re jî navê mafparêz, siyasetmedar û civaknasa Brezîlî Marielle Franco ku di sala 2018an de hat kuştin û navê mafparêz û sendîkavan û endama Greva Jinan a Swîsreyê ya sala 1991an Liliane Valceschiniyiyê hat kirin.
Axaftina vekirina eywanê ji aliyê Endama Meclîsa Lozanê û Hevseroka Meclîsa Partiya Yekîtiya Çepgiran Sevgî Koyûncû ve hat kirin. Sevgî Koyûncû ya Endama Meclîsa Jinan a Lajîn a Lozanê, di axaftina xwe de bal kişand ser serhildanên Jin Jiyan Azadî yên piştî kuştina Jîna Emînî dest pê kirin û bandora wê ya li Îran û seranserê cîhanê.
Sevgî Koyûncû gelek caran anî ziman ku dîroka 40 salî ya têkoşîna jinên kurd li gel berxwedana jinan a li Rojava ruh daye dirûşmeya Jin Jiyan Azadî.
Sevgî Koyûncû di dawiya axaftina xwe de têkoşîna aktîvîstên kurd Werîşe Mûradî û Pexşan Ezîzî ku rejîma Îranê cezayê darvekirinê li wan biriye û Soma Pur Muhammedî ya ku ji ber dana dersa kurdî deh sal cezayê girtîgehê lê hatiye birîn, silav kirin û axaftina xwe bi gotina Jin Jiyan Azadî bi dawî kir.
