Seba Kongreya Asayî ya HDPyî aşma temmuze yena nîşandayene. Weçînayîş ra dima mîyanê CHPyî de îstîfayî virazîyayî la HDPyî ra çîyêko winasî nîno pawitene, çimkî HDP partîya rexne û rexnedayîşî yo. Çend rojî verê cû vervatoxa HDPyî Ebru Gunaye Merkezê Pêroyî yê HDPyî de derheqê rewşa peyên a partîye de kombîyayîşê çapemenîye da. Bi eşkerayîya Gunaye eşkera bî ke HDP do dest bi prosesê newebîyayîşî bikero. Nika rewşêka winayêne pêro partîyanê ke Tîfaqê Miletî mîyan de bî de zî esta.
Weçînayîşê serra 2018î, yanî donemê 27. de hûmara weçînitoxan pêro pîya 59.354.840 bîye. Hûmara kesanê ke raye eştî 50.700.826, hûmara rayanê derbazdaran 49.654.706 û hûmara nîsbetê beşdaran zî se ra 85.42 bîye. Weçînayîşê serra 2023yî de zî hûmara weçînitoxan pêro pîya 64.190.651 bîye. Hûmara kesanê ke raye eştî 55.833.175, hûmara rayanê derbazdaran 54.796.074 û hûmara nîsbetê beşdaran zî se ra 86,98 bîye. Seke yeno zanayene şar û Tîfaqê Miletî netîceyo ke waşt dest nêfîna. Kêmanîyê partîyan weçînayîş ra dima vejîyayî raşte. Xeylê partîyan nîsbetê weçînitoxanê xo kêm kerd. Înan ra yew zî HDP bî.
HDP ganî tîya de kêmanîyanê xo bivejo raşte û bi zelalî xo rexne bikero. Ganî jenerasyono newe se wazeno, taybetmendîya ci çi ya, kam cû sîyaset û partîye de xo vîneno, sebebê kêmbîyayîşê rayan çi yo, CHP cayêkê sey Amedî de senî parlementer vejeno û seba çi rayê HDPyî kêm bîyî ser de bêra vindertene.
HDP weçînayîşê serra 2018î de 67 parlamenterî û weçînayîşê peynî yê donemê 28. de 61 parlamenterî şirawitî parlamento. Nê weçînayîşî de raşto kayê girdî qewimîyayî la ganî bêro qebulkerdene ke sîyasetêko şaş zî ame rayraberdene. Îqtîdarî heme kêmanîyî verê cû ra plan kerdbî û weçînayîş de kayê xo kerdî dewre. Pêkerdişê Huda Parî reyde herêma Kurdistanî de kontrol û pawitişê sindoqan teslîmê sofîyanê çimsûran kerd.
Semedê weçînayîşî fitwayî ameyî vetene û terefgirê AKPyî bîatê Erdoganî kenî. Mektebêkî de mamosteyo ke selahîyetdar bî wina vano: “Wextê nimajî de muşahidê înan nêşinê nimaj. Mabênê xo de vatêne no hîna ferz o, qezaya nimajî esta la tepîya agêrayîşê weçînayîşî çinî yo.” Sey haşhaşîyanê ke bîatê Hasan Sabbahî kerdêne, mezgşuteyê AKPyî zî bîatê Erdoganî kenî. Erdogano ke vengê xo tecawuzkerdişê domananê 6 serre û 2 serre rê nêkeno rê senî bawer kenê?
