Hemserekê PYDyî Salîh Muslîmî vat ke PDK hemkarîya hêrişanê vera kurdan keno û wina qisey kerd: “PDK seke çîyêk nêbîyo bêveng o. 1200 maskeyê gazî erşawîyabî gerîlayan la PDKyî dest nabî înan ser.”

Hemserekê PYDyî Salîh Muslîmî derheqê hêrişanê kîmyewîyan ê dewleta tirke û hemkarîya PDKyî ya bi dewleta tirke de ANFyî rê qisey kerd.

Muslîmî da zanayene ke dewleta tirke hînî bi zelalî vana ke armancê ci qetilkerdişê kurdan o û vat: “Dewleta tirke her warî de kurdî asteng kerdî û nika zî meseleya ci ya tewr girînge gerîla yê. Dewleta tirke bi barbarî hêrişê gerîlayan kena. Gerîlayî pawitişê meşrûyî kenê. Êyê ke dewleta tirke vera înan kena sucê vera merdimîye yê. Dewleta tirke 2018 de îşxalê Efrînî de çekê kîmyewîyî şuxilnayî. Rixmê xîretê ma zî çewî ney rê vengê xo nêkerd. Dima 2019 de îşxalê Serêkanîyê de zî çekê kîmyewîyî şuxilnayî reyna dinya bêvenge mende. Nika dewleta tirke nê çekan vera gerîlayan şuxilnena. Hêzê mîyanneteweyî goreyê menfeatanê xo têgêrenê. Ma zanenê ke nê çekî envanterê NATOyî ra yenê.”

Muslîmî vist vîrî ke hêrişanê kîmyewîyan de 47 gerîlayî şehîd bîyê û vat: “Gerîlayî ewladê Kurdistanî yê rûmetinî yê. Ganî çew vera nê hêrişan bêveng nêmano. Tay kesan waşt ke herême de nê hêrişan ser o cigêrayîş bikerê la PDKyî nê asteng kerdî. Herême de nêweşxaneyî pirrê mexdûranê hêrişanê kîmyewîyan ê. Nê mexdûrî bi nimitkî yenê tedawîkerdene. PDK seke çîyêk nêbîyo bêveng o. 1200 maskeyê gazî erşawîyabî gerîlayan la PDKyî dest nabî înan ser. PDK têna derdê rotişê petrolî de yo. Rûmetê şarê kurdî xemê înan de nîyo. PDK verê çimanê her kesî de îxanetê kurdan keno. Gerîlayî hê to pawenê la ti wurzenî dişmenî rê ber akenî. PDKyî wextê qirkerdişê Zaxoyî de zî merdimî asteng kerdî ke nêşorê Neteweyanê Yewbîyayeyan de gerreyê Tirkîya bikerê. Ewro birayê to (PDK) kişîyenê la ti bêveng î. Ti çira sucanê dişmenî nimnenî?

PDK hemkarê nê hêrişanê kîmyewîyan o. Dewleta tirke xora bêdestûrê PDKyî nêeşkena herême de nê çekan û bombayan bikirişa. Ma sey kurdan ça de benê bibê do xo bipawê. Çike ma verî de dişmenêko zulmkar est o. Seba pawitişê estbîyayîşê xo ma do xo ver bidê.”