Şaredarîya Mûşî serran ra dima weçînayîşanê 31ê adare de AKPyî ra derbazê DEM Partî bîye. Hemşaredarê Mûşî wazenê deynan biqedînê û cewab bidê hewcedarîyanê şarî. Hemşaredarê Mûşî Sirri Soylemezî ANFyî rê qisey kerd.

Soylemezî vist vîrî ke 1999 ra dima reya verêne şaredarîye bîya yê nînan û vat ke berê şaredarîya Mûşî her kesî rê akerde yo.

Soylemezî da zanayene ke bêkarîye şaristan de meseleya tewr pîl a û vat: ”Rîyê polîtîkayanê hukmatî ra şaristan de asta berzêre de bêkarîye est a. Bêkarîye ra merdimê ma koç kenê. Seba vindarnayîşê koçberîye ma dest pê karî kerd. Ma projeyî amade kerdî û pêşkêşê dezgehan kerdî. Hetê bînî ra ma pêro karanê xo bi ziwanê xo kenê. Ma do merkezê kultur, huner û kongre zî awan bikerê. Mûş de reya verêne tabelaya bi kurdkî ma daliqnaya.

Sey şaredarîye ma vera deynan zî xo ver danê. Ma wazenê cinî û ciwanan rê hetkarî bikerê. Bi projeyanê xo yê kooperatîfan ê qijan ma wazenê warêkê kede biafernê.”

Soylemezî îfade kerd ke şaredarîyanê verênan qetî xizmetê şarê nêkerdo û vat: ”Wexto ke ma dest bi wezîfeyî kerd, şarê ma xizmet çita yo dî û waştişê xo ardî ziwan. Seba ke nê waştişan bîyarê ca, ma do bi fedakarî bixebitê. Ma xîret kenê ke deynê ke AKPyî ra mendê biqedînê. Ma nika deyndarê Bankaya Şaristanan ê. Seba ke deynan biqedînê projeyê ma est ê.

Ancî ma giranîye danê xizmetê pakîye ser. Ma sozê xo yê loqantaya şaristanî arde ca. Ma do pêro rayîran virazê. Ma do trafîkê zêdeyî şenik bikerê. Ma meaşê kedkaran sereraşt kerdî û zem kerd. Hinî her kes zaneno ke şaredarîye yê înan a.”