Mûrat Çelîk ku di sala 1994an de li Erzînganê hate girtin û cezayê muebbetê lê hatibû birîn, piştî 31 salan hate berdan. Çelîk, li Girtîgeha Tîpa T a bi Ewlekariya Bilind a Xarpêtê dihat ragirtin û li pêşiya girtîgehê ji hêla malbata xwe ve hate pêşwazîkirin. Çelîk û kesên pê re, piştre hatin navçeya Bismilê ya Amedê. Çelîk, li vir ji hêla hevşaredarên navçeyê, nûnerên rêxistinên civaka sivîl û partiyên siyasî û gelek welatiyan ve hate pêşwazîkirin. Di pêşwazîkirinê de konfetî hatin etqandin, jinan lîrandin û dirûşma “Bijî berxwedana zindanan” hate berzkirin.

Hevserokê DBPa Bismilê Yûsûf Ataş di pêşwazîkirinê de diyar kir ku gelê Kurd dest bi pêvajoyeke nû kiriye û got: “Divê her kes xwedî li ‘Banga Aştî û Civaka Demokratîk’ derkeve.”

Mûrat Çelîk jî xwest ku girtiyên din bên berdan û dê têkoşîna xwe bidomîne. Çelîk wiha got: “Em 30 salan di girtîgehê de man û ev qet mesele nîne. Heval û rêhevalên me yên di vê rêyê de canê xwe dan hebûn û em jî dê li ser şopa wan bin. Rewşa Kurdan a niha ya li Rojhilata Navîn gelek baş e. Heke em xwe bêhtir birêxistin bikin dê azadiya me ewqas nêztir be.”