Hunermenda opera Mizgîn Tahîre bala xo ante girîngîya Şorişê Rojawanî û vat ke şoriş de bezreyê cinîya azade ame ramitene.

Hunermenda opera Mizgîn Tahîre bi wesîleya serrgêra Şorişê Rojawanî ANFyî rê qisey kerd û qala hunerê xo kerde.
Mizgîn Tahîre pare kerd ke aye û ekîba ci 19ê Temmuza serrgêra Şorişê Rojawanî de Kobanê de Orkestraya Domanan reyde şayîyêke kerde, xeylêk deyîrî vatî. Mizgîn Tahîre îfade kerd ke a tim wazena domananê Kobanê ser o berhemêkî biviraza.
Mizgîn Tahîre ard ziwan ke muzîk seba aye cuyêka azad a û vat: ”Ez wazena destananê kurdkî bi metodê opera vaja. Mi Şam de operaya klasîke wende. Ez mîyanê keyeyêkê hunermendan de bîya pîl. Babî, way û birayê mi dengbêj ê. Mi her tim estanik û destanê kurdan goşdarî kerdî. Ez nika wazena çîyêkê enternasyonelî yê kurdkî bikera. Ez Rojawanî ra ya la mi hema Kobanê nêdîbî. Coka mi waşt 19ê temmuze de şora Kobanê de konser bikera û mi kerd. Mi waşt ez mîyanê girseyê ke şehîdan azad kerdo de bimana.”
Tahîre dima no mesaj da cinî û ciwanan: ”Her tim peyê xeyalanê xo de şorê, xo aver berê, hunerî bimusê. Ez bi taybetî venga cinîyan dana ke fikr û xeyalê xo bîyarê ca, biwanê û wurzê we; çunke Şorişê Rojawanî de bezreyê cinîya azade ameyo ramitene.”