Mîmar Şerefhan Aydinî sosyolojîya Amedî ercnaye û wina vat: “Sosyolojîya yew şaristanî pê awanîyan û goreyê şiklê mîmarîya ci vejîyena werte. Nika sosyolojîya Amedî ha vurîyena.”

Amed de giranîye nêdîyena awanîya tarîxîye û kulturê komelkî coka her ca de blokê betonî virazîyenê. Mîmar Şerefhan Aydinî derheqê babete de ANFyî rê qisey kerd.

Şerefhan Aydinî vist vîrî ke Amed de vera sîteyî virazîyenê û vat: “Verî Amed de keyeyê bi baxçeyî û verberî est bîyî. Nê sîteyanê neweyan de merdimî mehkumê tenatîye zî benê. No zî sosyolojî yan zî kulturêkê neweyî îşaret keno. Verî yew torra paştdayîşî, têkilîyan û kulturî est bîyî. Nika nê pêroyî çin bîyî. Eke planê awanî û mîmarîya Amedî de Sûr biameyêne referanskerdene do wina nêbîyayêne. Awanîya Amedî zî hînî sey şaristananê bînan manena pê.

Mîmar Aydinî qiseykerdişê xo rê wina dewam kerd: “Sosyolojîya yew şaristanî pê awanîyan û goreyê şiklê mîmarîya ci vejîyena werte. Nika sosyolojîya Amedî ha vurîyena. Ganî ma bêrê pêser û qisey bikerê ke do se bikerê. Amed de nufus hende nêzêdîyayo la bînayî zêdîyayê. No zî netîceya hesabê xelate yê planê awanîye de bîyo. Sîteyanê 12 qatinan de beno ke 48 dayîreyî estê. Nê dayîreyî hetê sosyolojîkî ra sey bînayê hepskerdeyî yenê pênasekerdene. Komel zî goreyê nê bînayan hêdî hêdî xo dîzayn keno.”