Herêma Karerî ya qezaya Azarpêrtî ya Çewlîgî de bi bahaneya ke keyeyê hemwelatîyan texrîbkerde yê dewlete pê zorî kena ke dewijan keyeyan ra veja û TOKÎyanê Azarpêrtî de cabikera.

Dewijan pare kerd ke dewlete destûr nêdana ê dewa xo de keyeyî virazê û keyeyê înan zixm ê. Erdlerzê parî ra dima Komîsyonê Tesbîtê Xesarî derheqê xeylêk keyeyan de raporê xesarî nuşt û waşt ke dewijî dewan ra vejîyê TOKÎyan de cabibê.

Dewa Pîrcanî ya Karerî ra Zelîha Başusta Pîrha ra qisey kerd û da zanayene ke a do qetî keyeyê xo war nêverda û nêşora.

Dayîke Zelîha vat: ”Pereyê ma çin o ke ma xo rê keyeyêkê neweyî bikerê. Ma keyeyê xo berê ça? Tîya erdê min o ez nêwena şora cayê bînî. Pêro keye û merdimê ma nê erdî de bîyî pîl. Gorê ma tîya de yê, kal û pîrê ma tîya de yê. Ma rê vanê ‘Bêrê Çewlîg de biciwîyê.’ Ma çîyê winasênî nêwazenê. Pereyê ma çin o ke ma şorê doktorî. Eke kepçe bêra tîya ez xo erzenê verê ci. Wa mi bikişê. Heq ney qebul nêkeno.” ÇEWLÎG