Hemşaredarê Mexmûrî Bedran Pîranî ambargoyê PDKyî rexne kerd û ard ziwan ke ê do bi rayîr û fikranê Rayberê Şarê Kurdî Abdullah Ocalanî vera ambargoyî wurzê we.

Pîranî da zanayene ke kampa înan binê ablûqa de ya û vat: “Warê weşîye, perwerde, xizmetdayîşî û karkerîye de ambargo tesîrê ma keno. 1994î ra heta 2003yî kampe ra şîyayîşê teberî çin bî. 2003yî ra heta 2019î şarê kampe verê xo da şaristananê bînan ê Başûrê Kurdistanî û nê şaristanan de xebitîyayêne. Nê serran de kesanê welatperweran ê wayîrxêran zî hetkarîya kampe kerdêne. La 2019 de ambargo ronîya û no ambargo zî zaf hetan ra tesîrê kampe keno. Hînî nêweşê ma nêeşkenê şorê şaristananê Başûrî û tedawî bibê. No zî bîbî sebeb ke xeylêk nêweşî bimirê.

Hêrişê hezîrana 2021î ra dima hukmatê Iraqî soz dabî ma ke warê erzaq, gaz, perwerde ûsn. de hetkarîya ma bikero. La sozê xo nêard ca.”

Hemşaredarê Kampa Mexmûrî Bedran Pîranî îfade kerd ke kar û xebat û alternatîfê înan serê esasê fikranê Rayberê Şarê Kurdî Abdullah Ocalanî de yê û vat: “Eke merdim biwazo hişmendîya dewlete mezgê xo de bişikno, rayîr û alternatîfî fikrê Rayber Apoyî yê. Şarê kampe zî bi nê rayîr û alternatîfan, bi îradeyêkê pîlî vera ambargoyî wurzeno we û ambargoyî pûç keno.”