Roje çin a ke meseleya şarê kurdî bê teşqele bixelesîyo. Cuyayîş hertim şarê kurdî rê beno zehmet. Ne ke zehmetîya ti ca verdê û şêre. Na zehmetîye de xeylê çî vecînê orte. Roje est a semedê xo ceng kenê, roje est a semedê embazanê xo, roje est a semedê pêroyê şaran rê rayberî kenê. La şarê kurdî rê têna xoverdayîş û serewedaritiş beno bar. Badê weçînayîşê herêmî şaredarîyê ke hetanî nika xesp kerdbî kewtî destê şarê kurdî û şarê kurdî îradeyê xo beyan kerd. Semedê şaredarîye destê înan ra bigerê, çi dest ra ame pêronan bi sereyê berzî ard ca. Keyf û coş, huyayîş kewt turikê kurdan. Texrîbatê qeyûman heşt serrî yo xo nîşan dano. Pêroyê şarî zano ke mesela çi ya. Sazî û dezgeyan ra bigerê, kultur û ziman hetanî çaydan u kursîyan… Mesela zaf derg a û barî ya. Merdim gere baş bizano sere de qeyûm seyin tayîn beno, se keno, se kerdo û kamî dîyo? Zey verg û heşe mîyanê estanikanê pîrîkanê ma mezgê ma de ganî beno. La merdim eyro eşkeno bîyaro ziman, raşt a ke qeyûm verg o. Talan û xesp ra vêşerî çik nêkerdo. Têna dormeyê ci yê ke şinasnenê peyê hewt beyran de û peyê hewt kîlitan de nimite yo. Kam ey şinasneno, kam şîyo verê ci û derdê xo eşkayo bîyaro ziman. Şarê kurdî mesela him zano û him zî çareserî gêreno. Şarê kurdî 2 mîlyon rayî û 75 şaredarî gurotî dest. La zalim zulm keno. Bêtehemulîya îqtîdarî her ca de xo nîşan dana, wazena îradeyê şarê kurdî çin bihesibno. Le eyro ma vînenê se bikerê wa bikerê nêeşkenê îrade bigerê dest. Wexto ke şaredarîyî qeyûm ra pakij bîyî, şar bi rehetî kewt şaredarîyan. Milet zey xo vîneno hemşaredar. Wazenê mezgê şarî vila bikerê. Waştişê şarî çi bo, goş nêşananê. Vanê wa pêro ma dima bêrê. Ma se va, wa bawer bikerê. 8 serrî joyî bawer nêkerd, go nêkerejî. Bi xoverdayîş û zanebûn şar henî mesela fam keno. Bi gopal, bi runiştiş çi beno wa bibo, la îrade nêno şikitiş. Şaredarî de kîlitê hewt beyran bî a. Barîqatî orte ra vecîyayî. Hemşaredarî mîyanê şaristanî û sûkan de bi serreyê berzî gêrenê. Wexto ke mesela şar bo, merdim nêkuno peyê hewt beyran û kîlitan. Her çî eşkera yo. Mezgê şarî de qeyûm weş yeno famkerdiş. Eyro sûkan de şariştanan de ti kamî ra pers bikerê, zano qeyûm çi yo. Beno ke şexsîyetê qeyûmî nêvînenê, la pratîkanê ci pêroyê şarî vîneno û zaneno.
Weçînayîş îradebeyankerdiş o. Eger merdim îradeyê xo bişinasno, o wext tu qewetêk û tu zulmkar nêeşkeno vera îradeyî vindero. Esas no yo ke şarê kurdî hertim îradeyê xo dima şî û vindert.
Muhîmîya şaredarî na ya ke xizmetê pêroyê şarî bikero. Jo merdim ey bînî ra cîya nêbo. Pêroyê şarî eynî derece de yo. Nizdê hîrê aşmî yo şaredarîyan nefesêk girewto, no zî hetê pêronan ra yeno vînayîş. Kam çi biwazo, bi rehetî eşkeno şêro. Û hemşaredarî tim mîyanê şarî de gêrenê. Dewan de sûkan de ê tim şinê verê şarî. Destgirotiş nimê mesela halkerdiş o. Şar şaredarî ra çik nêwazeno, xususî waştişê şarî çin o. Wayîrê îradeyê xo bivecîye, têna nê wazenê. Wazenê bêrê naskerdiş. Şaro kurd nê hesasîyetî nîşan dano û semedî nê çi lazım bo go bîyaro orte. Sere nêtewenenê û hertim serreberz ê.
