Endama Meclîsî ya HDPyî Bedrîye Kuşe ard ziwan ke destbendkerdişê înan senaryo bî û wina qisey kerd: “Destbendkerdişê ma ra dima kombîyayîş ame kerdene û seba rantî tayê birî ameyî girewtene.”
28ê temuze de 5 endamê Meclîsê Şaredarîya Akdenîzî yê HDPyî ameybî destbendkerdene û dima vera dîyabî. Nê 5 endaman vizêr kombîyayîşê Meclîsê Şaredarîye de fotografê helanê destbendkerdişî yê bi nuşteyê ‘Kelemçeya Demokrasî’ û ‘Kelemçeya Rantî’ akerdî.
Kombîyayîş de Şaredarê Mersînî yê CHPyî Vahap Seçerî 5 endaman ra derbazbîyayîş waşt û îfade kerd ke destbendkerdişê înan karanê meclîsî de alozîye viraşte. Seçerî vat: “Mersîn şaristanê aramî, aşitî û yewî yo. Ganî ma firsend nêdê xîretê alozîvetişî.”
Dima Endama Meclîsî ya HDPyî û Hemsereka HDPyî ya Mersînî Bedrîye Kuşe qisey kerd û ard ziwan ke werte de sûcêk çin o, destbendkerdişê înan bi temamî yew senaryo bi. Kuşe vat: “Destbendkerdişê ma ra dima kombîyayîş ame kerdene û seba rantî tayê birî ameyî girewtene.”
Kuşe vist vîrî ke Şaredarê Akdenîzî yê AKPyî Mustafa Gultak roniştişê meclîsî yê 4ê temmuze de rixmo ke qanûnan de cayê ci çin o waştbî ke seba ‘PKK rêxistinêka terorî ya yan nê’ rayî bêrê şuxilîyayene. Kuşe vat: “Rixmo ke 20 endamanê meclîsî heman çi kerd yan zî nêkerd tena 5 endamê HDPyî ameyî destbendkerdene. Ez venga nê 15 kesanê bînan dana ke wexto ke no çi qewimîya şima şerm nêkerd?”
Kuşe dima karta sûre akerde û vat: “Ez na karte mojnena Şaredarê Akdenîzî Mustafa Gultakî.”
