Yewna wisar ame û xo reyde Newroze arde. Yewna Newrozêk bê to derbaz bî. Verê cû Newroze kelecenêko zêde mi zerrî de viraştêne la nika wexto ke Newroze yena çinîbîyayîşê to yeno vîrê merdimî û xemgînîyêko gird virazîyeno.

Seke wisar nê payîz ronişo serê erdî. Raşteyê Newroze de doman nêmendî ke ti fotografanê înan bianca. Vilik bê reng mendî. Huyayîş cayê xo da bermî. Çimkî sey huyayîşê to huyayîş çinî yo serê erdî de. Qey embazîya to hende weş bî? Ti rojêk qey mi nêdejna? Belkî to mi bidejnayêne ez go hende to ver nêkewtêne. Pêroyê vîrardişê ke ma pîya cuyayî hema zî sey vizêr ganî yî û verê çimanî mi ra derbaz nêbenê. Nêbeno ke ê ke to bişinasnî to xo vîra bikerê.

To zerrîya herkesî de cayê xo viraşt û dima ra to xatir waşt û ti şîya. To ma pêronan embaz û hemrayîya xo ra bêpar vera da. To embazanê xo ra hetêk xo reyde berd. Mergê herkesî ameyêne mi vîr la mergê to ma bê wext tepişt. Vengê huyayîşê to goşê mi de mend, cayê kar de bêvengîyêko ebedî virazîya. Vengê to her goşe de zimeno.

Rengê porê to, cil û bergê to û hetta şanê serê lewê to daxî hema mi vîr de yo. Erê embaza mi yewna serrgêra şehadeta to ameye. Zerrîya ma to rê bermena. Ti layiqê binê erdî nîya. Çende aşma nîsane yena vatiş û viraşdişê min û to yeno mi vîr. Rojêk ma gure ra vejîyayî û ma pîya rayraşîyayîş kerdêne. Varit varitêne. Porê mi hî bî.
To mi rê vat: Porê to hî bî, kelawa xo biance sereyê xo.
Mi to rê vat: Nê Evîne, wa varitê aşma nîsane bivaro porê mi û hî bikero. Dayika mi vana varitê aşma nîsane porê merdimi derg keno.

To zî vat: O wext ez zî kelawa xo biveja. Wa varit bivaro porê mi û porê mi zî wa hî bikero. Wa porê mi zî derg û weş bibo.
To wina vat û ma pîya binê varitî de rayîr şîyî. Porê to xora xozayî weş bî. Lazimîya to bi varitê aşma nîsane çinî bî.

Yewna vîrardişê mi û to zî wina yo. Şehadetê rojnamegere Nûjîyan Erhana ke 22ê adara 2017î de hêrişê PDKyî yê vera Şingalî de şehîd bibî, ya. Nûjîyan to ser de tesîrêko gird viraşte. Tesîro ke şehadetê Nûjîyane to ser de viraşte zêde wext derbaz nêbî to ma ser de viraşte. Zerrîya to şehadete Nûjîyane nêwedarna. Ti heskerdoxa gureyê xo bî ya. Rojnamegerî tewr zêde to reyde weş bî.

No serrgêra to de mi çîyê ke zerrîya mi ra derbaz bîyêne ke ez to rê vaja nuşt. Pêro hîssan nuştiş mumkun nîyo. Tu qelemêk hende xurt çinî yo ke to binusno. Wa cayê to mîyanê vilikanê wisaro ke to hema sere de ci ra xatir waşt, de bo. Wisar êdî bîyo payîz nê cayan de.